徘徊色情陷阱江若琳Carol步步驚心

每位藝人都有本屬於自己的奇遇記，天馬行空的事常發生在藝人身上，江若琳與楊梓瑤（Carol）的歷奇故事也許你略有所聞，前者爆出朋友遇到桃色陷阱，後者卻親身篤爆桃色騙局，兩人均用言行擊退騙徒，證明女星唔易呃

近年轉戰內地的江若琳（Elanne）早前亦「中招」，去年底她在內地工作期間入住的酒店套房被「爆格」，本年初她往杭州機場期間遇上野蠻司機拒載，嚴寒下要在高速公路截車。慶幸她只得兩次奇遇，而且都能平安無事，她說︰「之後就冇再遇過啲咩事，而且去內地做嘢都有助手，經理人都會陪我去，識晒當地嘅聯絡先會走，所以都好放心，唔覺有太大危險。雖然之前遇到呢啲事，但唔會影響我返內地發展。」

經過多年在娛樂圈闖蕩，無疑令Elanne變得更精，同時亦令她深知此行的險惡，她說︰「最近亦發生一件事，有位之前喺內地一齊合作拍戲嘅小朋友去咗一個不知名嘅劇組開工，點知失蹤，搵番佢嗰時已經畀人呃晒啲錢。」Elanne又透露身邊一位朋友險墮騙色陷阱，其朋友是Freelance模特兒但她不願公開友人名字，她說︰「我一個冇簽公司嘅Model朋友經介紹喺網上識咗個製片，個製片問佢『你係咪想拍戲？我哋有好多角色』。」這位製片說不到5分鐘已露出狐狸尾巴，她說︰「佢開頭同我朋友傾得都算正常，但之後個製片同我朋友講『要演女主角之類嘅角色就要係我女友先得』，意思即係要獻身啦，我朋友當然冇上當，仲即刻Blacklist咗佢。」

女人唔易呃

雖然不是發生在Elanne身上，但她愈說愈激動，還怒斥這位製片︰「佢仲要同我朋友講做演員要識得點去表達情緒，叫我朋友跟佢去賓館學，我真係好嬲！女人唔係咁易呃o架！人衰都算，但衰到咁樣，我覺得唔可以容忍，唔係就會有好多呢啲事發生！」Elanne非常認同「世上邊有咁大隻蛤乸隨街跳」，她說︰「我唔擔心會遇到，因為我有公司Backup，有經理人為我過濾，一定會問得好清楚先考慮接唔接，佢哋唔會騷擾到我，所以呢啲騙徒先會去蝦嗰啲冇公司嘅藝人！」

後記：南歸會粉絲

Elanne近年常到內地拍劇吸金，明顯較少時間留在香港，粉絲亦很少見到偶像，但今年其粉絲將收到好消息，Elanne說︰「依家籌備緊一張大碟，係今年嘅重心，所以會放多啲時間喺香港，可能之後先再返內地工作。」相信粉絲非常期待聽到其歌聲呢！

娛樂圈五光十色，光怪陸離，古怪事情多得想講也講不了。別以為楊梓瑤（Carol）「心胸」廣闊，甚麼都能接受，其實她是一棵含羞草，心中亦有一條底線，絕不敢踰越半步。Carol說：「係，鹹濕相我唔會拍，古怪有料飯局我唔會去，呢條就係我底線！」縱使如何防範，周街都滿布地雷，一不留神，莫講底線，隨時炸到粉身碎骨。未入行前，Carol試過誤踩地雷，想起也一額汗：「未入行前做Freelance模特兒，嗰時有間公司氹我影相，起初都唔知點解佢哋會有我聯絡電話，有人打畀我都心大心細諗緊去唔去，你知啦，當時我冇知名度，咪乜都試吓囉！」

試「錯」鏡

Carol愈講愈膽戰心驚，萬料不到那次Casting有「景轟」，她說：「記得當時我上去只穿運動衫，開頭傾咗三個鐘都冇乜事，只係叫我熄電話。後來就無端端叫一個16歲嘅女仔入嚟，話示範畀我睇乜叫專業！Casting個男人話要錫個女仔一啖，點知個女仔完全冇反抗，個男人仲沾沾自喜，話呢啲就係Pro，其後佢又問個女仔可唔可以摸佢胸，當時個女仔仲話『我覺得你唔會』，點知個男人就一揸揸落去，個女仔仲若無其事咁，真係睇到O晒嘴，好驚！當時即刻諗計離開，好彩最後走得甩。」

此後，Carol深知沒有最險惡的事，只有更險惡的事，更因愈來愈有知名度，很多古怪飯局如螞蟻摟蜜糖般襲向她，一次內地飯局令Carol記憶猶新：「有一次返內地拍嘢，公司老闆搞咗慰勞宴，成班演員都有去，我咪去囉！初時有人問過有冇女仔食完飯Stay喺度，我梗係唔會啦，食完就走。有前輩同我講過返內地做嘢有得揀，可以唔去下場，絕對唔怕得罪人。而去呢啲地方一定唔會飲酒，因為我逢飲必醉，半杯釘！」既然暗藏殺機，Carol又要吃娛樂圈這口飯，又要堅守底線，永遠做個玉潔冰清的小女孩？她說：「你話做呢行唔擔心就假，有時連自己都預計唔到下一秒發生嘅事，冇得驚，惟有做好自己嗰Part，事前要清楚工作性質，要識得Say No，唔好人講就去做，做一隻蠢豬！」

後記：北上闖影圈

「浸大E神」Carol終於畢業，正當大批宅男期待她出山之際，她卻表示要轉型，希望轉戰內地︰「計劃到內地拍戲，因為個市場好大，而且好鍾意演戲，電影會係首選，想大家留意我嘅演技多過身材。」看來此話會令不少宅男失望，但其性感寫真定必升值！