陳樂榣熊迷童夢

可愛的熊啤啤一向受女生歡迎，外表艷麗的陳樂榣，對顏色多變的Carebear情有獨鍾，但她是低調的「熊迷」，既沒有瘋狂購買Carebear產品，亦沒有要求男友送贈，只默默地欣賞這隻小熊的趣致可愛。

曾是性感組合Freeze成員的陳樂榣（Alley），撇開冷艷的外表，骨子裏仍保留着童真，原來她自小已喜歡Carebear，她說：「好細個已經鍾意呢隻熊啤啤，讀緊二、三年級就好鍾意，但香港嗰時冇得賣，得美國有，所以媽咪試過逼我鍾意其他嘢！大概6年前去台灣，見到類似雜貨店有，我先買咗第一隻Carebear，後來我啲Fans知我鍾意都會送畀我，不過我舊年開始已經冇擺晒佢哋啲嘢出嚟。」

嘆冇男人送

問到有沒有男士送Carebear討她歡心？她笑說：「通常唔會，多數係朋友送，追我嘅人唔會送，因為我係喺心裏面鍾意，低調地鍾意，加上Carebear難啲搵到，所以男仔都唔會刻意送呢樣嘢畀我。」Alley還透露現時已有一位穩定的交往對象，難怪不用其他男生討歡心，她說：「同男友拍咗兩年拖，都希望可以龍年結婚，啱啱開始籌備，佢係圈外人，我哋年紀相若，以前試過同比較大年紀嘅男人一齊，對方會比較大男人啲！嗰時會同自己講唔好咁細路女，仲會扮大人，但依家唔同，大家一齊出去佢都好大方，彼此唔會有壓力。」

她又透露男友從事的行業跟時裝有點關係，是家族生意，至於男友知不知道她喜歡Carebear？Alley想了想，然後笑說：「佢知嘅！但佢唔鍾意儲玩具，所以佢知道之後都冇咩反應。」

重拾童真

Alley現時在友人的畫廊教小朋友畫油畫，算是半退出娛樂圈，她教小朋友時相當有耐性，而且充滿童真，與幕前的性感形象可謂判若兩人，問到是否會退出幕前？Alley坦言男友的確想她專心教畫，加上在畫廊可以完全發揮其藝術天分，故男友亦希望她可以擁有屬於自己的畫廊，並繼續在這方面發展，相信Alley能在畫廊找到童真，就像Carebear一樣！