無綫主持被插冇料到

歐國盃於昨日凌晨開戰，無綫邀請陳百祥、阮兆祥和張國強吹水講波搞氣氛，卻慘遭網友怒插爛Gag無聊及冇料到！而廣東電視台由比堅尼女郎陪睇波，獲網友激讚有睇頭！

無綫直播今屆歐國盃四場賽事，昨日凌晨的開幕戰由陳百祥（阿叻）、阮兆祥（祥仔）、馬國明、張國強和李綺雯等眾星講波打頭陣，他們本是講波常客，應「實食冇黐牙」，怎料遭網友狂轟他們欠專業，似茶餐廳阿叔吹水，尤其是祥仔的爛Gag：「雙手插落個火鍋度，不知淥（鹿）死誰手！」故被網友群起嘲「爛Gag到爆」和「自己搞Gag自己笑」，並揶揄他為「金句王」！但亦有網友指他搞笑及具幽默感，富喜劇效果。

祥仔獲封「金句王」

祥仔昨日接受訪問時說：「個笑話係自己度，平時度定啲Gag隨時娛樂大家！睇球賽已經好緊張，所以搞吓Gag紓緩氣氛，亦都冇咁悶，專業嘅講波都係畀番專人講！」不過所謂「專業」球評家鍾志光亦被網友勁彈，就連嘉賓馬國明都被批評：「波又唔識講！Gag又搞唔到！」而張國強以「呢『條』友好硬淨」形容球員，被網友嫌粗俗。張國強昨日回應：「現場對白事前度好晒，呢啲閒話只係真情流露，會記住網友嘅批評！」

比堅尼小姐醒神

不過，內地廣東體育頻道則以十幾位第四屆長隆比堅尼小姐大賽的候選佳麗，穿火辣比堅尼講波，獲網友激讚好橋：「深知男士熬夜看球辛苦，來點醒神的！真係好給力呀！出到呢招！」而昨日now sports頻道副總裁賴汝正表示不會效法：「即將會有太極、楊天經講波經，會好似開Party咁搞氣氛，唔會用波妹宣傳，大家各有各做。」

對於與李克勤隔空講波的阿叻揚言冇有怕：「最好克勤窒到我，因為都好耐冇人窒我，每次我開聲，啲人就啞晒，都唔知係咪我操守有問題！」而馬國明昨日出席足球慈善盃為長者籌款，他表示昨日凌晨因遲了入電視城而錯過觀看首個入球，故大感可惜。