恨嫁陳嘉桓唔敢識男仔

曾遭陳浩民醉酒攬錫的陳嘉桓（Rose）昨日出席婚紗騷時直言有結婚衝動，奈何因早前的不快事件而不敢結識新朋友，至今仍未有對象，就算溫柔兼十項全能也無用武之地！

陳嘉桓昨日為婚妙騷擔任模特兒示範三套婚紗，其中一套是古董款式，她笑言突然好想結婚：「上次去康城，去咗一個古堡食飯，呢條裙好古典、好襯，如果着住呢件衫去古堡影相，一定好似幅畫咁！可惜我未有對象！（努力搵對象？）冇機會識新朋友！」

冇人追唔驚做剩女

問到是否怕遇上色狼？曾遭陳浩民在內地攬錫的Rose坦承有陰影：「自己試過唔愉快嘅事，因為咁而少識新朋友。（有陰影？）都過咗去，身邊朋友有提點我，自己會小心啲！」

不過，Rose自認年紀細，不擔心成為剩女，但卻承認身邊未有追求者。問到是否因她太打得而嚇怕追求者？她無奈地說：「唔知咩原因！（扮溫柔去吸引男仔？）其實我好溫柔，放工會買餸煮飯，以前仲會買傢俬返屋企自己砌。（咁唔係溫柔係好Man喎？）男仔會覺得好感動，女仔十項全能都幾好。」

Rose表示師兄杜宇航也沒有男孩子介紹給她，並揚言擇偶條件不需要打得：「大家互相學習，唔一定要打得。（將來會唔會因為有爭執而打老公？）暴力解決唔到問題，到時由娛樂版變咗港聞版就唔好啦！」