林嘉欣輕鬆湊女心郁再追

林嘉欣母親近日捲入與契女賈辰穎的錢債糾紛,但無損嘉欣心情,昨日與女兒Kayla外出時表示,事件令母親心煩,而她認為上庭是最好的解決方法,無論是誰錯都要承擔後果,事件絲毫沒有影響母女間感情。

林嘉欣母親與契女的錢債糾紛涉及約40萬加拿大元(約300萬港元),有指此事損害嘉欣母女關係。昨日是嘉欣自事件發生後首次露面,偕同女兒Kayla與傭人到灣仔,先到45R店舖自製紮染頸巾,她對合照的請求來者不拒,與店員和其他顧客有講有笑。然後她與兩名女性友人到附近茶敍,活潑的Kayla不停在商場內走來走去,與工人大玩追逐戰,獲不少途人稱讚可愛。期間Kayla向嘉欣撒嬌,大叫媽媽又扭抱,嘉欣肉緊地又攬又錫女兒,更不時從手袋拿小食給女兒品嘗,一副有女萬事足的冧樣。

母親心煩拒聯絡

問到有否擔心母親的錢債糾紛?她態度友善地說:「上庭都好,法官係睇證據。媽咪又好,對方又好,邊個錯都要承擔後果。」至於有否與母親聯絡?她坦言媽媽沒有接聽電話:「我都有打畀佢,但佢冇接聽,我諗佢心煩。(有指媽咪愛錫契女?)我唔清楚佢哋關係,淨係知有呢個人。」又稱事件無損母女感情。

她又透露現時專心湊二十個月大的女兒,無意拍戲:「有好劇本都暫時唔考慮。(追多個?)都想,但唔係話有就有,順其自然。(幫個女搵學校未?)遲多一年先,都係搵番Local學校。」

四仔拱照黎淑賢

此外,「多仔婆」黎淑賢昨日首次獨自帶四個囝囝外出共度周末,一圓心願,卻使她筋疲力盡。期間三個兒子不停呼喚她,沿途「媽」聲四起,途人為之側目,驚嘆她生了四個兒子之多。黎淑賢全程孭着數個月大的細仔,無法去廁所,但看到四個兒子如此開心,她亦覺值得。

名人組

面對眾多陌生人,Kayla挨實媽媽,嘉欣溫柔地耳語安撫,母愛洋溢。

Kayla賣甩媽媽通處走,返回嘉欣身邊後即肉緊錫錫。

黎淑賢帶囝囝逛街兼食大餐,一拖四盡展湊仔功力。