羅力威個唱門票搶光 火速加場

加盟英皇的羅力威獲公司點名力捧，8月舉行的兩場演唱會，門票在網上優先預售，5分鐘內火速售罄，即時宣布加場！對於粉絲大力支持，他形容自己執到，有這個成績十分感恩！

於2009年參加《亞洲星光大道》的羅力威，人氣一直高企，年初加盟英皇後迅即成為力捧對象，現定於8月1及2日在九展舉行2場演唱會，門票分為380元及250元，並於昨晨在網上優先預售，5分鐘內火速售罄，英皇隨即宣布加開3日1場，門票本月底公開發售。

羅力威得知演唱會售票反應理想，開心得多謝粉絲支持，他笑說：「好耐冇開過騷，多謝佢哋仲未忘記我。」羅力威出道近3年，雖然至今仍未推出個人唱片，但個唱優先門票已經被搶爆，被指是圈中奇迹，他說：「我係好感恩，呢2、3年有起有跌，有開心、有唔開心，但我一直抱住個信念就係唔好放棄，依家苦盡甘來，今個月底我嘅唱片就推出喇！」

希望羽翹捧場

個唱票房報捷，羅力威形容自己執到，喜出望外，他感謝粉絲支持：「我會唱得動聽啲、落力啲報答佢哋。」問到下一個目標是否進軍紅館？他坦白地說：「梗係想！喺紅館睇騷就睇得多，都希望將來有機會喺紅館開個唱，但要打穩根基先！（今次會唔會表演跳舞？）我諗將來喺紅館跳畀大家睇。」問到可有邀請緋聞女友羽翹捧場？他說：「我都希望個個朋友都嚟睇！屋企人都問過我有冇飛，我要睇公司安排，所以都唔敢幫大家訂飛住。」