郭晉安望靠硬淨食胡：我會再有高峰

貴為視帝的郭晉安演技毋庸置疑，目前他最想再創另一高峰，但要如何突破自己？就是要作出變化，他更說：「要再有一個高峰好需要天時、地利、人和去配合。」

好多人問我係咪到咗演藝生涯一個高峰點？其實我覺得會再有高峰，但未必係靠喜劇，會係演一啲好實在、硬淨嘅戲種同角色。好似《與敵同行》、《團圓》咁。回顧過往成績，其實對獎項已經睇得好淡，做呢行「實至名歸」呢四個字唔係靠一個獎項帶嚟，而係觀眾眼睛畀嘅，自己付出幾多自己知，唔係博大霧等運到。當年（攞獎）的確多咗知名度、工作同收入，過後工作持續增長，每部劇都有好大回響，到今時今日仲有搵我登台同拍廣告，所以我認為獎項對事業有幫助，但長遠計，都係要靠自己努力同付出。

撐無綫待員不薄

我可以話一直喺無綫成長，雖然離開過三年，但最終都返無綫作依歸。無綫對員工不薄，只係礙於香港市場太細，福利始終不及外國大，起碼（外國）會有工會撐新人，聽聞佢哋講對白逐粒字計錢。陳法拉同我講過，我哋連一個美國有對白嘅特約演員薪酬都不如，呢個唔怪得無綫，市場係得咁大，一個餅點分得咁多畀三千員工，你要大份啲、食多啲，咪要自己努力啲囉！

不受王維基利誘

每年都有人搵我「離開」，近年嘅次數仲頻密咗，王維基都搵過我，我同佢講我仲有某個年份嘅合約，唔想佢再嘥時間喺我度，我唔係扭計，將來嘅事冇人知，只係唔想阻人時間，不過都好開心識到呢個朋友。我22歲就加入無綫大家庭，同導演、監製甚至化妝人員都培養出一份感情，呢啲係用錢買唔到嘅，呢一刻我冇諗過走，除非無綫唔要我，或者無綫唔再拍劇啦！（全文完）

後記：真性情零掩飾

現實中的郭晉安絕對不是「阿旺」化身，談吐簡潔清晰，說話不轉彎抹角，自然直接，毫不掩飾。談到家庭軼事，不期然流露幸福之情；提及辛酸及恩人時，他會花時間去回憶，想到觸動之處，又會感性得雙眼通紅。可以肯定的是，郭晉安是感情豐富的性情中人。

口述：郭晉安　筆錄：影視組