郭晉安讚冇架子：哥哥同我跳舞

郭晉安甫出道便被指貌似張國榮（哥哥），更被喻為哥哥接班人，曾有唱片公司為他推出唱片並展開歌唱事業。他憶述當年得哥哥親臨錄影廠鼓勵，令他畢生難忘！

我喺95年獲唱片公司垂青，推出首張亦係唯一一張專輯《一分一刻一點也願意》，當時我前途好浮沉，希望出唱片可以幫到我，想製造話題提高知名度。

當年好多人話我似張國榮（哥哥），更有人話我係佢接班人，我當然冇所謂啦，但最怕係哥哥會介意，原來佢好照顧新人。有次我喺廠度拍劇，哥哥當時已經好紅，佢喺隔籬廠做嘢仲過嚟我個廠，問導演需唔需要替身，佢份人真係好好，好有陽光活力。

有次喺台慶，哥哥拉咗我出去同佢一齊跳舞唱歌，佢同我講做新人咩都要試，有機會就要把握。我有聽佢講，可能佢都捱過，見到仲捱緊嘅藝人會作出鼓勵。

最令我印象深刻嘅係哥哥打算封咪嗰一年，我同佢又喺無綫錄影廠遇到，佢主動問我有冇興趣睇佢演唱會，我當然答有啦，只係擔心買唔到飛啫！結果佢即刻叫助手拎四張飛畀我，仲問我咁會唔會去睇，我話梗係會啦！我當時好感動，冇諗到一個天王巨星咁好人，咁冇架子。

唱唔起

會唔會打算再出唱片？唔得啦，咪當係當年付出過嘅回憶算喇！有朝一日我退休，起碼唔會有一樣嘢未試過。唱歌我玩唔起，其實我近年都有同容祖兒合唱電視劇嘅主題曲，又擔任佢演唱會嘅嘉賓。我仲幫李克勤做咗十場嘉賓，我喺紅館唱一首歌都咁大壓力，成個人攰到散晒，所以做歌手真係唔易o架！（明日待續）

口述：郭晉安　筆錄：影視組