孫穎朋友中招 許亦妮「生」人勿近

昨日WhatsApp瘋傳內地迷魂黨再度活躍，受害者輕則被劫財劫色，重則隨時喪命！港姐許亦妮的媽咪曾在內地被扑頭，她坦言在內地會嚴防陌生人，而「琵琶公主」孫穎則揚言有朋友中招！

港姐許亦妮的媽咪，本年初不幸在內地被扑頭黨扑穿頭，對於有傳沉寂一時的內地迷魂黨再度活躍，許亦妮坦言在內地會提高警覺、時刻提防！她說：「經過媽咪件事，我都有陰影，有陌生人行近就擔心！」談及媽咪的傷勢，她說：「媽咪依家冇咩事，但佢話短期內都唔會去內地，而我就有去。今年好黑，我最近都整親腳，搞到骨裂！」

丁子高唔擔心家人

經常穿梭中、港的丁子高則表示，聽過不少有關迷魂黨的傳聞：「我聽過有啲修甲店表面係修甲，其實係賣內臟，用指甲幫你驗DNA，啱買家就落手迷暈你，醒番先發現身體有個傷口，原來畀人割咗部分內臟！又聽過有人醒後，身處放滿冰嘅浴缸，身體又係有傷口。」他認為在港亦要提高警覺：「就算喺香港有陌生人畀嘢你聞，都要即時行開。婆婆出街通常有人陪，媽咪就好醒目，唔使擔心。如果有人向我求助，我會扶佢，但用奇怪眼光利誘嘅話就會行開。」

至於著名鋼琴家劉詩昆的徒弟、「琵琶公主」孫穎，更揚言有朋友中招：「佢一過羅湖就有個假公安請佢幫手查案，上車後聞咗啲令人頭暈嘅嘢，迷糊中被帶去一間屋，然後拎張卡（提款卡）出嚟同講出密碼，我朋友個戶口有七十幾萬！」被困近一個月期間，朋友的證件及電話均被沒收：「銀行有打去問，但由匪徒代答，直至拎晒所有錢之後，先蒙佢眼丟佢喺街，佢自此唔敢再去內地！」