郭晉安谷底回望：真係好坎坷

郭晉安1986年參與首部劇集《城市故事》展開演藝生涯，翌年憑參演大製作《誓不低頭》一炮而紅，但同時令他陷入事業的困局。

我拍完《誓不低頭》後好快上位，但同時間陷入浮游階段，我要諗方法繼續向上，但又要搵錢包裝自己，愈包裝自己，啲錢又唔知點嚟。我記得當年出席台慶嗰套戰衣都要慳，亦試過戴住鴨嘴帽頭耷耷搭港鐵。拍完廠景半夜收工，試過等成粒鐘搭第一班巴士過海，死都唔肯搭的士就係要慳。返到屋企攰到第二朝出門前先沖涼，真係好坎坷！

外闖拍劇環境惡劣

直到1994年演出劇集《生死訟》，成為咗全年最低收視劇集，我嘅事業可以話跌入谷底。當時好大打擊、意志消沉。以為自己好得、好掂，但原來好多事唔係人可以掌握同控制，我一定要搵一條出路。直到1995年，我決定離開無綫外闖，之後有外來公司邀我外出拍《孫子兵法》，酬勞可觀到可以買樓。但當時好辛苦，啲拍攝地點好恐怖，基本上似電影中打仗軍人住嘅地方，食宿都唔得，以為有菜食，其實喺地下摘啲唔知咩就炒畀你，居住環境好惡劣，酒店冇冷氣、冇水！之後又拍咗《新龍門客棧》，工作同收入係穩定嘅。

1998年我決意重返無綫，當時監製梁家樹同我講：「你返嚟就好嘞，點解唔早啲返。」我當時好感動，發現無綫先係真正嘅「屋企」，我寫張卡畀梁家樹話自己會努力，會搵番失去嘅嘢。之後我有機會拍《創世紀》，但問題又再出現，同時間有人用可觀酬勞請我出去拍劇。我諗住放棄拍《創世紀》，當時珍姐話做乜咁傻放棄呢個機會，我同佢講對唔住，我真係好需要呢舊錢。點知當年台慶，我竟然抽到架車，我即刻同珍姐講，我可以拍喇！因為我賣咗架車就有嗰舊錢。我深深感覺到一切自有主安排！

（明日待續）

口述：郭晉安　筆錄：影視組