郭晉安：我冇望子成龍！

郭晉安入行廿五年，事業登上高峰亦擁有美滿家庭，自從一對仔女出世後，他坦言生活起了巨大變化，「養兒一百歲，長憂九十九」，他對子女愛得緊張。由今日起連續五日，郭晉安會與大家分享家庭、事業和鮮為人知的圈中辛酸事！

我同太太歐倩怡2006年拉埋天窗、2008年大仔郭令山出世、2011年再追多個女郭以雅。我四十三歲做老竇，生小朋友係我計劃之內，有擔心老來得子會同仔女有代溝。我結婚時雙親都離開咗，無法見證到我嘅人生大事，都有遺憾，依家到我同仔女有年齡差距，我會諗番第日啲仔女結婚時，自己仲喺唔喺度呢？如果個仔好似我咁遲婚，我真係再擺唔到多四十年o架嘞！

我屋企有五兄三姊，自小阿爸為口奔馳、媽咪係家庭主婦，哥哥家姐照顧我最多，所以我缺乏一套教育子女嘅藍本，需要自製一套教育子女嘅方式。我本身個人唔係咁專制，覺得如果下下都黑白分明、規行矩步嘅話反而造成代溝。我視仔女為朋友，父母唔好做嚴父嚴母，我主張冇階級。

初為人父好驚

大仔令山出世之後，令我嘅生活產生好大變化，起初覺得「好驚」！雖然佢未出世前我已經有晒心理準備，但事實原來同諗嘅有好大出入，覺得真正進入人生另一階段！我以為可以輕鬆咁面對，但原來係唔得！最印象深刻係令山七、八個月大時，有次半夜發高燒，我哋兩公婆驚到手足無措，佢不停喊又唔識講咩事，最後送咗佢入院。我當時諗小朋友咁細個點解要受呢啲折磨？佢又有鼻敏感，有次捽眼搞到隻眼腫到雞蛋咁大，我感覺到佢自己都好驚，好彩我同太太都係基督教徒，認為子女患病唔應該將責任歸咎父母身上，我哋互相勉勵將個仔交託神。

把愛世代相傳

我會幫小朋友換片、沖涼，第日佢結婚我呢啲相好有用，有相為證，等佢知道父母對佢付出咗，一定要好似我哋咁延續落去對佢哋嘅小朋友。我冇望子成龍，只求佢哋健康成長，我哋冇揀名牌學府，唔需要搬屋遷就。間幼稚園千幾二千人考，面試時囝囝好叻錫咗老師一啖。令山好乖巧，會表現童真一面，佢第一日上堂喊到呼天搶地，但第二日冇喊兼自己入班房，點知第三日又喊，原來佢以為只係返兩日！

我同太太都試過為子女問題嗌交，但最緊要大家先冷靜落嚟，最終都能夠解決問題。我會經常親自接送令山返學、放學，希望用最多嘅時間陪佢成長，唔想佢做港童！佢依家好叻識自己着衫、着褲、着襪。我陪佢出入就係怕佢太倚賴工人，我要訓練佢乜都自己做。早前傳聞有拐子佬出沒，我都有煩擾過，好在依家知道個原因可能係個別家庭糾紛同誤會，未去到大社會嘅問題！我試過瞓唔着上網睇人留言，大家都好擔心，但我冇同個仔講有拐子佬，唔想佢知道世界上有咁多壞人。（明日待續）