周柏豪卡冚卡度日：破產咁滯

周柏豪出身小康之家，後來因父親生意失敗，幾乎全家人失業，前路茫茫；幸周父沒有放棄，才令生意再次翻生，難怪他視父親為學習對象！

屋企係做生意，沙士之前生意好好，好風光，可以話要乜都有，後來經濟不景加上撞正沙士，爸爸間廠執笠，失業咗九個月，當時撞啱我爆瘡患病，全家人得阿哥做嘢，屋企要碌卡維生，卡冚卡，去到破產咁滯，嗰陣媽咪個車牌夠期要續，連一千蚊都冇，到依家媽咪五十幾歲，佢話都費事續番個牌，覺得有啲可惜！

爸爸失業嗰段時間，仲Keep住每朝起身煮早餐畀我哋食，我同佢講，話你冇嘢做可以瞓晏啲，唔需要日日起身煮早餐，跟住爸爸答我一句，我到依家都記住，佢話要Keep住自己嘅生理時鐘，唔可以畀自己頹廢落嚟，因為唔知道機會幾時嚟？

爸爸人緣真係好好，後來有個朋友搵到錢幫佢一把，佢嘅手袋生意就做得番起，之後到呢個朋友唔掂，爸爸又幫番佢，做人就係咁！

父親教落買樓投資

之前講過，我最初做Model儲咗少少錢，同爸爸夾份買咗層細細哋嘅樓，雖然嗰段時間屋企冇錢，供得好吃力，但錯有錯着，層樓兩年後升咗二十萬，我哋就賣咗佢去換間大啲嘅！呢樣嘢都係爸爸教我，佢話搵到錢唔好用晒佢，要學識投資先有用，所以我好細個就已經買樓喇！（明日待續）

口述：周柏豪　筆錄：名人組