周柏豪患焦慮症：不停鬧屋企人

周柏豪入行前曾任職模特兒，卻因突然爆瘡而令夢想破碎，心情低落得患上嚴重焦慮症，導致與家人及朋友關係惡劣，陷入黑暗幽谷！

我18歲嗰陣做過兼職模特兒，拍過一個網上廣告，跟住網上瘋傳，出街都畀人捉住影相，Job開始多，覺得錢好容易搵，當時覺得做Model真係好，自信心強到爆，一朝得志，特登出街喺啲最人多嘅地方，等人搵我影相，好膚淺。嗰陣我仲簽咗模特兒公司，諗住全職做Model，嗰陣我阿爸已經冇做嘢！不過諗住我正式出嚟做嘢搵到錢，就同阿爸夾份買咗間平平哋嘅樓，諗住一齊供，點知所有嘢預備好晒嘅時候，我塊面突然爆瘡，成塊面好似月球表面咁，每日洗面都流晒血，當時真係覺得晴天霹靂，情緒開始有問題，患咗焦慮症，一邊睇皮膚科，一邊睇心理醫生，成個生活變晒，不停鬧屋企人，朋友都遠離我。

學音樂走出黑暗

嗰陣我好唔開心，諗住去外國讀音樂，遠離呢個地方，老闆見我咁，就提議我與其去外國讀音樂，不如喺香港學音樂，就介紹咗陳光榮畀我識，依家陳光榮都係我一個恩師、師傅，將我由黑暗之中帶番出嚟！

我跟陳光榮學咗兩年音樂，嗰兩年完全冇入息，但好開心，原來快樂係用錢買唔到，嗰陣時我乜都做，斟茶遞水，後來陳光榮叫我試吓摸吓部電腦，做吓音樂，我好記得自己作咗幾句歌錄低咗！每晚收工坐喺巴士上面聽，呢種感覺好實在。之前有情緒病，我好驚夜晚，但嗰兩年醫好咗我嘅焦慮症，皮膚病亦不藥而愈，真係好神奇！（明日待續）

口述：周柏豪　筆錄：名人組