栢芝抱病返港拒講霆鋒

早前遠赴康城宣傳新片的張栢芝，昨晨由經理人及化妝師等陪同下返港。戴Cap帽、口罩及耳筒的她甫出閘看到傳媒時未感驚訝，只急步走向停車場，但眼見傳媒邊走邊拍照，她即說：「我行慢啲，畀你哋『交功課』！」明顯心情不錯。問到返港會否與兩名兒子補祝自己的生日？抱恙在身的栢芝說：「病好先再算啦！（霆鋒傳生日短訊畀你？）唔想講咁多喇！」原定為閉幕禮擔任頒獎嘉賓的栢芝最終因抱病而推卻，問到會否感到可惜？她說：「OK啦！睇咗醫生先！」

另外，近日愛上打羽毛球的霆鋒與歌手劉浩龍老友鬼鬼，劉浩龍前晚上載與他的合照並留言：「增肥呀？搵佢啦！」霆鋒則邊笑邊舉「V」字手勢，食得開懷！

栢芝臨上車前企定定及拉高帽子任影，非常Nice！