連詩雅慾照解畫 哭訴信錯人

歌手兼演員連詩雅與Rap仔曲赤的脷疊脷慾照離奇流出，昨日她急開記者會交代事件。她哭着承認當年曾深愛曲赤，在信任對方的情況下拍攝親密照，並默認曾發生性關係，如今慾照流出令她很失望！

連詩雅與陸永太太泳娜分別有脷疊脷慾照流出，「經脷人」同是Rap仔曲赤（K-Chek），正值上位的連詩雅（Shiga）形象插水，而陸永則代老婆出頭怒轟曲赤！前日仍死撐開工的Shiga，昨日在唱片公司及經理人公司高層陪同下舉行記者會交代事件，身穿白衫、黑褲及黑色外套的她化上淡妝，影單人照時已雙眼通紅，並不時抖大氣，當坐低交代慾照事件時更哭成淚人！

無意追究事件

Shiga先作出一番自白：「我要交代尋日發生唔開心嘅事，好想承擔細個做過嘅事。我承認同相嗰個男仔拍過拖，當時影咗較親密嘅照片，但因為嗰時好愛佢同真係好信任佢，所以先影咁親密嘅相，至於……（飲泣、助手遞紙巾讓她拭淚）啲相點解流出嚟，我真係唔知，亦唔想追究。」

她承認以前愛蒲：「做咗好多無謂事，嘥咗好多時間，但近幾年人大咗，好想努力工作，今次件事令家人、朋友同公司都好擔心，所以好想行出嚟話畀大家聽，會勇敢面對自己做過嘅事，多謝大家關心同多謝客戶體諒。經過呢件事，我以後唔想再提呢件事，因為今次係非常唔開心。」

換手機失聯絡

連：連詩雅　記：記者

記：你有冇呢啲相？

連：自己冇。

記：啲相係咪佢本人（曲赤）流出嚟？

連：我唔想咁樣諗人哋，相信人哋有好嘅一面，所以唔想追究啲相點流出。

記：知唔知啲相得佢擁有？

連：（點頭）

記：事件發生後有冇打畀佢？

連：冇，我冇咗佢電話，因為我換過好多次手機，冇咗佢電話號碼，我哋已經分開咗，冇聯絡。

記：拍拖時幾歲？

連：16歲。

無懼再洩慾照

記：男方話有過性關係？

連：（尷尬）我同佢係男女朋友，拍拖嘅事係有做過。

記：佢話唔見咗iPad，信佢？

連：呢啲唔想去細究（仔細研究），件事發生好唔開心、好突然。

記：有冇其他情慾照？

連：記憶中就冇。

記：佢回應時好隱晦？

連：唔研究件事點解咁發生，自己好失望、唔開心，好……（爆喊、喪流淚）好突然。

記：若佢打畀你，聽佢解釋？

連：呢一刻咩電話同咩人都唔想講，好多人關心我，收到好多Message，多謝大家，我真係需要時間冷靜。

記：工作受影響？

連：公司好好，一路幾日有工作，暫時冇影響。

記：向律師求助，出禁制令？

連：交畀公司安排。

性格不合分手

記：識唔識陸永太太？

連：唔識佢。

記：如果真係有人靠呢啲相宣傳，覺得好可恥？

連：我唔想咁去諗人，只可以話好失望，因為我相信對方先同佢影呢啲相。

記：後悔識呢個人？

連：唔好話後唔後悔，因為我曾經愛過佢，只可以話細個做咗啲無謂事，今時今日要為做過嘅事負責。

記：同曲赤拍咗拖幾耐？

連：一年。（分手原因？）性格不合。

記：佢係咪爛蒲飲醉酒咀女？

連：我唔知，嗰時係返學年代，夜晚佢會唔會出街我唔知，因為佢打畀我時，可以話瞓覺。

記：佢嗰時讀書定做嘢？

連：佢做Sales，亦有Rapper表演。

記：你會戒夜蒲？

連：我將所有時間放喺工作，人大咗唔好再浪費時間，希望家人生活得更好。

記：怕唔怕過往嘅男友攞啲咁嘅相出嚟？

連：唔會。

記：拍拖唔敢再影相？

連：會小心啲，所有任何相都小心保管，家人樣貌都唔想攞出嚟。

臨時缺席工作

記：你哋點認識？

連：當年學校好興Rap，同學嘅朋友介紹佢畀我識。

記：家人有咩反應？

連：當然好擔心，媽咪有安慰我，叫我唔好諗咁多。

記：媽咪當年知你哋拍拖？

連：媽咪知道，但冇見過佢。

記：外界用「爛蒲」形容你，你覺得點？

連：承認爛蒲同爛玩過，但入行後將所有精神放喺工作。

歷時12分鐘的記者會結束後，Shiga與唱片公司及經理人公司高層合照，再流出大滴眼淚，高層即拍膊安慰她，然後離開。

Shiga原定明天與師兄周柏豪出席網站活動，但在最新的傳媒邀請中，她的名字已改由莊思敏頂上。據知她捲入慾照風波後，風頭火勢下甩底活動，但經理人指她因為有事才缺席。