阿B婚期Delay 鍾懿下令要細佬

鍾鎮濤的囡囡鍾懿向來具音樂天分，早前便與爸爸合唱一曲《爸爸的話》，兩父女昨日接受電台訪問時，鍾鎮濤透露婚期最快延至明年，遭年紀小小的鍾懿催促結婚並希望有個細佬！

鍾鎮濤（阿B）與二女兒鍾懿前陣子以「父女檔」合唱一曲《爸爸的話》，將收錄在阿B下月推出的專輯內。新歌MV更飛到法國巴黎取景，兩父女昨日接受查小欣訪問，阿B解釋再度跟囡囡合唱的原因：「我希望可以記錄佢嘅長大過程，而且畀機會佢試多啲嘢，見多啲人。」而只得七歲的鍾懿全程對答如流，絕不怯場。

早前阿B透露於今年內跟拍拖多年的女友范姜結婚，問到何時正式實行？他說：「本來真係打算今年，但因為太多朋友都係今年結婚，全部都要去飲，所以今年唔結住。」並坦言跟女友都不着急，反而常遭囡囡催促，在旁的鍾懿說：「我唔係催你哋，只係想媽咪生個細佬，依家有一個哥哥同三個姐姐妹妹，有埋弟弟就最好啦！」笑不攏嘴的阿B說：「我驚細佬到時叫我做爺爺！」

夢想花都行禮

對於父母的結婚地點，鍾懿坦言最好在巴黎：「可以望到巴黎鐵塔，而且地方好大又好靚！」阿B則以慈愛的聲線跟她說：「去巴黎結婚等你大個自己結嘅時候先啦！」同時表示作為父親，唯一願望是兒女們可在無風無浪的環境下長大。