周柏豪愛驚喜：唔排除閃婚

周柏豪外形不俗，加上冧女有一手，故緋聞女友多的是！雖然他對緋聞一一否認，但不忘大讚自己是個好男友，最愛製造驚喜，更不排除閃婚！

入行以嚟，傳媒寫過我好多緋聞，除咗何超雲之外，仲有Janice Man、江若琳、吳雨霏、薛凱琪、模特兒鍾浠文等，我可以大聲咁講，全部都係假嘅！反而入行前，我就同過圈中人拍拖，但邊個就唔好講啦！

其實我想同圈外人拍拖多啲，始終呢個圈太複雜，如果同圈中人拍拖，會擔心對方係咪心懷不軌，同埋唔想自己嘅新聞都係圍繞感情，同圈中人拍拖，大家都會成為焦點。好似我情人節車吳雨霏，畀人影到即刻大做文章，其實嗰日因為大家都冇嘢做，諗住約出嚟食個Tea，我哋都知情人節畀人影到實好煩，所以就話不如唔好出街，一齊去我哋都識嘅朋友屋企，就係咁簡單！

至於近來記者影到嘅圈外朋友Stephanie，我同佢只係朋友，不過當然係有好感啦！如果唔係都唔會接佢放工，總之我只可以講，我哋依家係好好朋友嘅階段。拍拖會唔會公開？視乎大家嘅情況啦！但一定要大家好肯定對方先會公開。

最愛搞喊女友

我自問係一個好男友，最鍾意製造浪漫驚喜搞喊女朋友，我試過親手整朱古力，拍低晒成個過程；又試過錄咗個MV，等女朋友生日嗰刻播畀佢睇，女朋友見到開心到喊，見到佢哋喊我會好開心，呢啲係情趣！我好鍾意畀驚喜身邊人，所以絕對唔排除秘婚或閃婚，而且我都28歲，係時候諗吓結婚嘅問題！我嘅擇偶條件係要錫屋企人、錫小朋友同尊重生命，有齊以上優點嘅女仔就完美喇！（明日待續）

口述：周柏豪　筆錄：名人組