周柏豪：冇同陳山聰開火

28歲的周柏豪較同齡的男性成熟，也許與他的成長經歷有關。他曾走過不少人生低潮，患嚴重情緒病、失業、父親面臨破產等。不過，人總是要嘗過苦才能練成金剛不壞之身，如今的柏豪百毒不侵，即使曾傳與陳山聰爭奪賭王何鴻燊女兒何超雲失敗，他也只是一笑置之。柏豪將一連五天分享其家庭、事業及人生的高低起跌，讓大家更加了解全新的周柏豪！　

我正式入行到依家已經五年，出過唱片、拍過電影、電視劇、舞台劇，覺得好幸運有機會試到好多唔同類型嘅工作，等我可以吸收更多經驗。知名度多咗！隨之而來緋聞亦唔少，或者呢個就係做藝人嘅附帶條件！好多人問我係咪同賭王何鴻燊先生個女何超雲拍拖？我向來不擅辭令，今次就等我清清楚楚同大家剖白一次啦！

愈講愈誇

其實我係認識佢個妹何超蓮先嘅！超蓮係我嘅粉絲，有次我舉行簽名會，佢嚟支持我，之後我哋就認識咗！後來我演舞台劇，超蓮透過公司話想嚟睇，佢話家姐超雲都想一齊嚟！咁嗰次就係我同超雲第一次見面，之後大家都係喺Facebook或SMS往來，就係咁簡單。第二次見面就係喺一個車嘅活動上，我唔知道係咪有人「安排」？記者話我哋尷尬，真係冤枉囉！

所謂嘅「緋聞」愈講愈誇張，後來更發展到我向佢現任男朋友陳山聰「開火」，嗰單嘢真係夠無聊。記得嗰日係大年初三赤口，因為屋企習俗初三唔會拜年，我就同細佬去咗打War Game，我哋仲貪玩喺微博「互片」，佢寫：「夠膽射我？」我就回應：「我已瞄準了你！」咁就被斷章取義，嗰日打完Game後，公司就打電話畀我，話好多記者打嚟問，其實我冇澄清過，我只可以講我唔認識陳生，我亦冇見過佢哋一齊，依家我同超雲都冇聯絡，反而跟超蓮仲有聯絡，過時過節都會傳祝福SMS，就係咁樣。基本上我同超雲、超蓮都唔算熟，但佢哋兩個都好有禮貌同好人。

口快腦慢

整件事我最介意嘅係有人話我借佢哋做宣傳，我花咗好多時間喺音樂上，如果咁樣講，對我好唔公平。老實講，我有一個毛病，我個腦轉得比嘴慢，所以好多時我個口講咗個腦都未諗到，所以成日畀人誤會。好似之前有記者影到佢哋兩個坐直升機去澳門，然後問我知唔知？我就話：「記者都影到啦！係真喇啩！」點知出咗嚟就話係我踢爆佢哋，所以我之後講嘢都好小心，唔想再被人有錯覺我講嘢有問題，成日口不擇言，或者講過又唔認數。總之我同何超雲真係冇拍過拖，更加冇同陳山聰開咩火，我同何超雲同何超蓮只係朋友，講完！

（明日待續）

Profile

姓　　名：周柏豪（Pak Ho）

身　　高：1米82

星　　座：天蠍座

興　　趣：唱歌、攝影、彈琴、彈結他

喜歡顏色：黑、白

喜歡動物：貓

喜歡運動：游泳、籃球、保齡

喜歡歌手：Damien Rice、Keane 及Coldplay等

喜歡演員：尊尼特普、秦沛

口述：周柏豪　筆錄：名人組　攝：黃叔榮