葉熙祺整容人辦無添加

內地整容風氣旺盛，不少攻港的內地女星都同樣眼大面尖，周秀娜師妹、內地「過江龍」葉熙祺今年殺入香港，大眼的她自問全身純天然，但靚樣促使一班朋友跟住「執」，對於多了幾個「A貨」姊妹的她大感無奈！

正當近年不少香港藝人北上搵人仔之際，內地卻有大班新人攻港，而一眾身材逼爆的乳模最為搶鏡。其中一位24歲內地女孩則以清純可愛的形象俘虜港男，她就是內地歌手葉熙祺（AK），一雙大眼睛加一副標致面孔，AK甫出道已冧掂內地男粉絲，單靠靚樣已吸納一大批裙下之臣。對於被宅男封為「女神」，AK聽見即有點尷尬，她說：「哈哈！要多謝佢哋，我仲未係女神，未達到呢個層次！」而AK心目中的女神只有妮妲莉寶文（Natalie Portman）︰「我覺得好似佢（妮妲莉寶文）咁先係女神，最少要外表Perfect且有內涵，我畀自己個樣80分。」

「A貨」在身邊

提到樣貌，內地女星大多樣靚身材正，但不少卻是「改造人」。同是國產級的AK樣靚不用多說，故她難免被列入疑似整容女星的行列，惟她堅決與整容保持距離：「我冇整過，自己唔係娃娃臉，所以之前冇人問我有冇整過容，但我有啲抗拒呢樣嘢，我唔係怕痛，只係可能會危險唔安全，會出事！」但大多數女子都是貪靚，她身邊有朋友為靚而改造，更曾提出以她的靚樣做倒模，確實非常誇張，最後當然被她拒絕︰「內地整容風氣比較勁，身邊朋友同同學仔都話想整，仲叫我一齊去，要照住我個鼻嚟整，當係一個模型咁去整，但我話唔得！」拒絕又如何？最後還不是出現了她的「A貨」︰「識咗一個姐姐差唔多10年，佢愈嚟愈似我，好多朋友都問我同佢係咪孖生，佢有去做微整容，整得細啲，但我唔覺因為自己樣靚所以佢跟住整，只係覺得佢有啲奇怪。」

日本搶灘成功

若翻查資料，AK是一名歌手、演員，更是一位模特兒，早前還推出了寫真集，並進軍日本行騷及登上日本報章娛樂版頭條，來頭確實不小！年紀輕輕已多棲發展，令她非常享受：「好鍾意每樣工作，雖然我喜歡唱歌，但拍戲係另一種嘗試同挑戰，可以見識更多，所以好享受依家嘅工作模式。」今年她則攻港拍攝處女電影，雖然戲份不多，但有幸與男主角張智霖有感情線已令她非常滿足︰「宣傳寫真集時有幸可以接到一部電影，呢部係處女作《天生愛情狂》，講好特別嘅愛情故事。」

謝絕男生睇樣

AK在《天》片中有錯綜複雜的感情關係，但現實中她卻非常專一，這位大眼美女仍是單身但並不着急︰「我承認有好多異性朋友，但都有好多女性朋友，因為我比較忙，依家都係以工作為主，唔可以固定喺一個城市，好難建立感情，最長喺一個城市住一個星期就要飛。」她笑言恍如「空姐」，連與朋友見面的時間亦非常少︰「唔會成日識新朋友，都係同一啲識咗好耐嘅朋友講我返嚟喇，但過兩日又會同佢哋講我要飛喇！」也許工作令她冇時間談戀愛，雖然未有愛情滋潤，但相信對宅男來說絕對是一個好消息。雖然工作忙到冇時停，但不代表AK沒有追求者，提到裙下之臣的追求攻勢，AK卻不願多談︰「其實都冇乜特別，因為我用平常心，發生咩事都唔覺有特別，可能會用一啲令人覺得好誇張嘅條件啦，但係點就唔講喇！」她堅拒只求追靚女而展開攻勢的男生︰「如果做得朋友就真係會互相關心，有事會幫手，但如果只係睇個外表，就唔會做到好長嘅朋友！」

後記：我要增肥

AK個子纖瘦，是不少女星夢寐以求的身形，但不足100磅的她卻為此而感到煩惱，她說︰「我其實想增肥，之前試過用兩年時間去增磅，食好多嘢，但都係肥咗幾磅，真係好想再肥啲！」她更笑言想變肥婆，但小記勸她話不要亂說，因為這番話已令不少港女嫉妒呢！