郭羨妮誕6磅女 同日Birthday

郭羨妮原定於下月初生「龍女」，但醫生決定提早開刀，「小天使」於周二出世，重六磅一安士，與母親一樣是22日出世！老公朱少杰親自剪臍帶，事後笑言緊張得個心差點跌出來。

與內地武術指導朱少杰拍拖年多便結婚的郭羨妮（Sonija），婚後不久便成功造人，原定下月初剖腹生小龍女，但醫生提早為她開刀！Sonija昨日向外界公布喜訊，於周二（22日）已順利剖腹誕千金，重六磅一安士，與母親一樣在22日出世，甚為有緣！而老公朱少杰一直陪伴在側，由於女兒仍未有名字，故他倆現以「小天使」稱呼愛女，幸福滿瀉！Sonija昨日接受電話訪問，難掩心中喜悅，她說：「終於踏入媽媽身份，無論換片定開奶都難唔倒我，但媽咪都有幫我手，感覺好幸福。」問到為何提早兩星期分娩，她說：「開刀日子係醫生揀早咗，不過都好，我個肚真係好大，由懷孕到生重咗足足幾十磅，生之前嘅體重有160磅！」

Sonija坦言囡囡出世一刻，不禁感動落淚，老公全程陪伴在側，更親自操刀剪臍帶。她早前曾指老公有點緊張，問到當日他怕不怕？她笑說：「佢喺度扮鎮定！事後佢同我講，個心差啲跌出嚟，我就打咗麻醉藥，傻吓傻吓咁！（個女似邊個？）眼睛似爸爸，但其他好似鼻、口、手腳就似晒我。（咁咪有少少混血兒Feel囉！）我都係四分一個混血兒，我都覺得佢有少少o架！」問到老公是否已請假陪伴，她續說：「佢會一直陪住我先，等我所有嘢都Settle Down。依家我都落得床行，但傷口仲痛！」她又坦言仍未上奶，稍後會再嘗試餵人奶。

心急減肥復出

另外，Sonija昨日接受節目《東張西望》訪問時透露，老公陪入產房後才發現不能攝錄：「老公視女兒為小情人，不時望住個女好耐咁甜笑都唔會厭。因為剖腹生產，傷口仍然痛，需要食止痛藥。依家要專心坐月同食有營養嘅食物，但同時又要減肥，希望快啲復工。」無綫高層樂易玲則透露已與Sonija聯絡，對方不時傳來笑聲：「好開心！無綫女藝人排住隊生，真係好多喜事！（佢心急復出？）等佢調理好身體先都未遲。」

相士陳子才表示Sonija的女兒五行屬水，命格外柔內剛，具藝術家細胞，有機會從事藝術工作，但性格比較獨立同剛強。他又指孩子只是一般旺父母，如果名字改有與金、水相關的字會更有利。

感謝宣言 物輕情重

郭羨妮周二剖腹誕下女兒，其武術指導丈夫朱少杰外剛內柔，特別在微博上多謝愛妻，他留言傳情：「謝謝妮親愛的老婆為我誕下一個可愛的BB！」郭羨妮睇到當然心都甜，以六個心形圖案答謝丈夫對她的鼓勵！