Deep@Closer被禁「發言」
熱愛彈結他的歌手吳浩康（Deep），今年一改單飛姿態，聯同蔡皓（Johnny）和林健亨（Ryan）夾Band，並取名Closer在樂壇重新出發，亦是英皇娛樂首支樂隊。Deep自言再做「新人」感覺新鮮，更笑說：「鍾意試新嘢，過多幾年可能會變一變，角逐『女新人』獎添！」
近年樂壇潮興組Band，Deep強調不是追潮流：「唔怕同其他Band比較，反而覺得愈多愈好，百花齊放，各有各玩又可以Jam埋一齊，擦出更多新火花。」
幾個大男孩夾Band，Deep承認即使感情好亦有意見分歧的時候，他說：「吵吵鬧鬧少不了，但係大家都係對事唔對人，所以冇隔夜仇。（你最鍾意講嘢，嗌交實係你贏？）都唔係o架！不過公司唔准我做隊Band嘅『發言人』，想畀多啲機會其他成員發表意見。」
Closer偶有爭拗，但無損愛夾Band的精神。
吳浩康雖然愛說話，偏偏被禁做樂隊的「代言」。