陳志健讚精明 羅苡之爆「口花」留印象

2006年港男健力組冠軍陳志健，今年向「甘草王」羅樂林女兒羅苡之成功求婚，正密鑼緊鼓籌備10月舉行的婚禮。兩口子不時互讚對方，Sweet到漏，但羅苡之卻自爆最初對「夫婿」的印象很壞！

香港先生出身的陳志健（Otto）與羅苡之（Tisha）今年10月拉埋天窗，現時忙於籌備婚禮，行禮日期及地點已安排好，但Tisha透露在籌備過程中，亦曾跟Otto有小拗撬，她說：「一對新人喺籌備婚禮期間，點都一定有摩擦，不過我哋會互相遷就，希望可以搞掂個婚禮啦！」

Otto與Tisha因合演舞台劇撻着，至今拍拖兩年多，Otto對這段戀情甚為珍惜，不時大讚「準老婆」，他說：「佢係一個好叻嘅女仔，好多時喺決策上都可以幫到我。雖然我人工唔高，但佢好支持我依家做緊嘅行業，畀好大嘅力量我！」Tisha卻大爆對Otto的第一印象其實相當負面，她笑說：「最初覺得佢講嘢冇句正經，以為佢係個花花公子，後來進一步了解，覺得佢心地好好，對老人家好有心，而且尊師重道，呢樣嘢好難能可貴！」

唔急造人

問到婚後會否火速造人？Otto說：「自己係好鍾意小朋友，不過生BB就應該冇咁快，至少要有經濟能力先。」Tisha則表示想先享受二人世界，才考慮生育。