陳敏之透黑Bra 森美屁股識笑

無綫小花黃智雯在新劇飾演雙非孕婦，日前拍攝一場邊喊邊講對白的內心戲時，她大講自創的半鹹淡廣東話，爆笑連場。而陳敏之則處女下海拍落水戲，上岸時透黑Bra！

黃智雯、陳敏之與森美等日前拍攝新劇《法網狙擊》，飾演雙非孕婦的智雯逃走時，被演警察的敏之及森美撞個正着，結果齊齊失足跌落海。由於要演繹內心戲，智雯埋位前刻意離群「自閉」培養情緒，到正式拍攝時，她以半鹹淡廣東話邊說邊哭，七情上面，但鏡頭後的工作人員卻齊齊爆笑！她笑說：「嗰啲語言係我用自己鄉下話再改少少，我唔覺得好笑，但身邊啲人都爆笑囉！其實我好認真o架！哈哈！（演孕婦好難？）某程度上係，因為我冇呢方面經驗，所以要諗其他嘢令自己投入。」

睇好贏配角獎

對於智雯的「外星語」，敏之坦言招架不住：「佢簡直入型入格，相信套劇出街後，觀眾都會好鍾意。我同智雯合作過，覺得佢好乖女，做戲好好，睇好佢今年攞女配角獎！」懂得游泳的敏之，當日處女下海拍落水戲，笑言可藉此消暑。神勇地跳落水的她，起初還可輕鬆地踩水，但數分鐘後即喊停：「對鞋入晒水好重，我好攰，要停一停先！」

小休過後，敏之與森美很快便完成拍攝，上水時，衣衫盡濕的敏之透出黑Bra，性感誘人，而拍檔森美亦不輸蝕，在白色長褲下透出「哈哈笑」孖煙囱，他還抵死地拍打臀部，令在場的菲籍臨時演員哈哈大笑，頗為頂癮！

否認紅斑狼瘡

另外，敏之昨日接受查小欣電話訪問時否認患上紅斑狼瘡症：「我冇事好健康，只係之前腎炎，報道誇張咗！要定期睇吓腎臟指數，依家都冇乜嘢。（你去唔到廁所？）邊係？我去好多廁所，忍尿唔關腎事。」