趙碩之：龔嘉欣想反擊我

「是非攝石」趙碩之性感惹火，連無綫小花龔嘉欣都是她的對頭人！碩之坦言當年二人拍攝第N輯「四葉草」《盛裝舞步愛作戰》時，因對方眼紅自己風頭太勁，竟想慫恿其他人反擊她！

我同「四葉草」大部分演員感情Keep得好好，好似早前香蕉（王淑玲）生日，我哋都有一齊食飯慶祝，同場仲有當年嘅導演Wilson（錢國偉），只得龔嘉欣好少出席我哋嘅活動，我哋都好少約佢嘅！

學詩雅口音

老實講，我同龔嘉欣嘅感情最唔好！因為當年合作，佢覺得我好搞事、愛做風頭躉，佢想聯同其他人向我反擊！當時我覺得冇咩大不了，畢竟大家都想爭取見報！我覺得佢好實際、好現實、好叻女！我知道不久將來，我會喺麥雅緻嘅婚宴上見到佢，有人話佢呢幾年變咗好多，我都信嘅，所以我屆時會放下成見接觸佢！

至於感情最好嘅係詩雅同李蘊。我鍾意詩雅嘅程度，係可以不期然跟咗佢嘅口音講嘢，可能我覺得呢種口音親切啦！好彩戒甩啫！同佢拍「四葉草」時，我除咗欣賞佢夠中立，仲欣賞佢夠大方！當時洪卓立都係同劇演員，我覺得佢係歌手好厲害，所以唔敢打攪佢，不過詩雅竟然同佢對答如流，我覺得佢好厲害呀！

當李蘊妹妹

至於李蘊，我當佢妹妹咁囉！可能佢年紀仲細，我見佢蝕底咗會主動提點。佢除咗父母唔喺香港時會嚟我度瞓之外，有時會帶貓上嚟探我，有時又會上我屋企一齊敷Mask，感情好似一家人咁，我都當佢嘅弟弟係親細佬咁o架！（全文完）

後記：性感大細路

不是說笑，不認識碩之的，會被她在報道中的言行嚇死；但若認識她，則會被她笑死！私下她不擅辭令，跟她談話猶如猜啞謎！性感女神原來仍是大細路，話說拍攝場地有鏢靶，她不禁要一顯身手，可惜成績麻麻！為了營造「型爆感」，她囑咐攝影師先拍她的特寫Chok甫樣，再叫他將鏡頭轉移特寫早已另找專人在紅心位置插好靶的鏢靶，好有計喎！

口述：趙碩之　筆錄：影視組