趙碩之遭撞胸：覺得自己好笨

趙碩之讀書時雖然是男仔頭一名，但上圍驕人的她仍不能幸免在港鐵慘遇鹹豬手，但當時她選擇啞忍！入行後以性感作招徠的她，不時在網上遇到性騷擾，不過現時她不會再啞忍！

當我仲係學生，有次搭港鐵逼到好似沙甸魚罐頭咁，身邊有個男人十足冇腰骨咁，隻手不時有意無意咁撞落我個胸度！雖然我用File隔住，不過仲感到佢隻手壓落嚟……嗰次我冇出聲，我覺得自己好笨囉！不過因為我好嬲，我喺Xanga不斷重複訴說呢件事！自此，我好憎金鐘港鐵站，我心諗：「做咩要咁多人？令呢啲人（鹹豬手）有機可乘？」

遇網上性騷擾

入行後，幸運地我冇再喺街上遇到鹹豬手，不過網上性騷擾仍不能幸免！我試過喺微博放咗兩年前嘅Cosplay Look照片，因為我覺得好可愛，所以想同大家分享，點知有網民留咗句好惡心嘅說話，我忍唔住轉發佢個留言，我要佢同我一樣勇敢咁面對呢件事！既然講得出呢種話，即使唔係惡意，都應該站出來面對啦！

又記得有次，我偶然瀏覽討論區，發現有啲網民除咗鍾意將我同其他模特兒做性幻想對象外，仲會不由分說咁話我哋係妓女、又話我哋打假波！依家諗番嗰啲所謂Comment真係好好笑！我明白佢哋只係想有個平台發洩，對象係邊個都冇所謂，所以根本毋須對呢啲人嘅說話執着，不過當時我睇到呢啲留言，真係好嬲囉！

（明日待續）

口述：趙碩之　筆錄：影視組