趙碩之「斷背」4年：只係傻更更

曾被指是同性戀者的趙碩之，不諱言讀女校時曾因「錯覺」與同學拍拖，雙方關係更糾纏達四年之久。雖然如此，她否認是同性戀，強調當初愛上女生，全因不可自決！

中學時我覺得有個女同學好型，其實我都唔清楚自己係咪鍾意佢，只係覺得「有啲嘢」。加上同學成日討論我同佢，聽得多我就覺得自己真係好鍾意，不過當時我冇採取任何行動，因為我根本唔知道拍拖為何物。我只係接受自己鍾意對方，但冇諗過要面對……

後來有日小息，佢帶咗我去操場表白，當時我其實好怕，不斷疑惑件事點解發展成咁？當佢同我講「我鍾意你」時，我只係識得回應：「咁你想點呀？」搞到佢好尷尬！但佢冇放棄，返到課室後仲傳紙仔畀我，而我就好似被迫接受咗佢嘅感情。不過我哋冇做乜嘢，放學拖手已經好大不了，有時佢要求我錫佢，我只係扮懵錫面就算，我係幾唔肯面對呢段感情嘅。

更搞笑嘅係，我哋拍咗一個星期左右，我已經淡咗，所以我覺得自己唔係同性戀，只係太易受人影響！過咗一年，佢有咗男朋友，我哋就結束咗。當時我冇咩感覺，反正都丟淡咗。但過咗一段日子，我矛盾嘅性格又出現，我問自己之前明明咁喜歡佢，點解突然又唔喜歡？所以我突然任性咁決定，即使佢有男朋友，我都要繼續喜歡佢，其他女仔向我示愛，我都唔理，我覺得咁樣好型……到佢同男友分手後，我哋又好似「有啲嘢」，但之後又再不了了之，四年嘅「糾纏」就此結束。

佩服自己專一

如果有人問我係咪同性戀？我覺得唔係，就算我同過女仔一齊，亦唔算乜嘢戀愛，好明顯只係傻更更，人哋話我喜歡就胡亂投放感情，但我幾欣賞自己嘅係，當初即使唔知拍拖為何物，都同嗰個女仔行咗咁多年，我佩服自己嘅專一。（明日待續）

口述：趙碩之　筆錄：影視組