畢佬未定婚期風「鬚」晒戒

留鬚的畢彼特昨日現身康城電影記者會，早前宣布已跟女友安祖蓮娜祖莉訂婚的他右手無名指戴上婚戒，坦言期待有機會再跟未婚妻合作新片，至於確實婚期則仍然未定，要等這兩位大忙人得閒先傾！

荷里活型男畢彼特（Brad Pitt）於康城時間昨晨11時，偕電影《Killing Them Softly》導演Andrew Dominik及眾演員出席記者會。早於記者會前數小時，已吸引大批影迷洶湧而至，欲一睹畢佬風采，法國演員兼導演Gustave Kerven更想黐住畢佬博上鏡，最終被大會保安驅趕，他更高舉中指「回敬」。未知是否為了配合畢佬在戲中的殺手形象，他以長髮鬍鬚的風流倜儻造型示人，其右手無名指的婚戒亦相當搶鏡。因記者會舉行的時間甚早，眾演員顯得目光呆滯，畢佬屢次要記者重複問題。

未婚妻送直升機

據知畢佬早於去年聖誕已向女友安祖蓮娜祖莉（Angelina Jolie）求婚成功，有指兩口子將於今年8月11日在法國結婚，畢佬卻否認傳聞：「呢排好忙，未有確實結婚日期。」之前有傳他們會結伴往康城，安祖蓮娜又買了直升機給畢佬，但最終因安祖蓮娜忙於籌備新戲劇本而無暇赴會。他們當年因拍攝《史密夫決戰史密妻》（Mr. and Mrs. Smith）而擦出愛火花，畢佬坦言有興趣跟未婚妻再度合作，於今次新片演殺手的他不怕教壞細路：「呢個只係角色，有啲戲意識仲差，例如強姦犯。」有日本電視台到現場拍攝綜藝節目，找畢佬簽咪牌，他全部有求必應，十分親民。

此外，安祖蓮娜的前夫、男星比利卜科頓（Billy Bob Thornton）接受電視訪問時表示，他跟安祖蓮娜在友好關係下協議離婚，兩人定期會聯絡，關係良好，是一世的好朋友。另一邊廂，英國導演堅盧治（Ken Loach）的新片《The Angels' Share》跟畢佬的電影於同一日開記者會。