趙碩之Hi Bye娜姐：驚佢批我(月爭)

擁有D Cup驕人上圍的趙碩之（Wylie），2008年憑熱賣的寫真集竄紅，一年後，周秀娜以有過之而無不及的性感姿態殺入寫真界爭長短，更與Wylie爆發罵戰。回顧過去，Wylie坦承太衝動，更直認私底下碰見娜姐會心虛，甚至怕被對方批！她將會一連五天大談感情事及被性騷擾的經過等。

我覺得周秀娜好叻女，嗰陣（出寫真集）我爆咗出嚟，其實冇心理準備，唔識承接落去，有段時間好掙扎，唔知自己想點。但周秀娜就唔同，佢同男友（陳偉成）溝通得好好，對方唔單止好支持，仲畀好多意見，呢啲都係佢嘅優勢，令佢可以勇敢咁喺輿論壓力下走落去。

其實我好鍾意呢個女仔，偏偏我出完寫真集之後嗰年佢又出，媒體自然會比較我哋，造成日後對罵嘅局面。依家諗番嗰陣，都覺得自己好蠢，人哋話周秀娜話我啫，我唔求證就九秒九話：「你同佢講我要鬧番佢。」其實當時可能都知未必係事真，但撳唔住把火，咁樣好蝕底，唔識我嘅人仲以為我博出位。　

唔會同錢鬥氣

私底下同娜姐梗係唔會約出嚟玩啦！話有都係呃你。呢點我覺得好可惜，其實我哋之後合作過兩部戲（《死神傻了》及《關人7事》），兩次見面都有Say Hi，平時出席活動都有打招呼。不過就算我對佢冇心存敵意，對住佢我都好心虛，驚佢會叫我企開啲，同介意我行近會批我，其實好驚佢因為隔空罵戰件事唔鍾意我。

好多人問我點解屋企咁有錢都要咁搏、咁性感？屋企係唔使等我開飯，但我冇必要同錢過唔去。我嘅理想係拍戲，但邊個咁好彩可以日日有戲拍？冇嘢拍咪做第二啲嘢囉！以登台唱歌為例，雖然每次唱歌我都會好緊張同忘詞，但唔通幾萬蚊一首歌唔唱咩？係咪咁折墮先？做人無謂同錢鬥氣。

着樽領都咁索

初入行時我唔覺得自己特別性感，直到知道嗰陣冇乜人會着比堅尼影寫真，我先知自己好大膽。但既然都開咗個頭，有時經理人叫我着性感啲，我都會照做，亦因為咁變咗性感Icon，唔性感嗰陣，啲人會問我點解冇（事業線）？不過就算着樽領，只要有身材，線條都會好靚，呢啲係遮唔到，除非你畀件斗篷我o架啫。（明日待續）

死敵一號當冇到：使乜認真

對於Wylie揚言見到會心虛的周秀娜，聞言笑不攏嘴地說：「其實佢真係應該輕鬆啲，呢個行業使乜咁認真呀！我份人好Casual，個個都啱傾，不過嗰陣拍戲可能各有各忙，先至冇時間同佢傾偈啫，下次見到再慢慢傾囉！」她又直言對Wylie印象OK：「話晒大家差唔多時期出道，都唔會有敵意得去邊！我同佢真係好耐冇見，仲以為佢退出咗江湖添！呢句都係講笑，Gimmick啫！」

Profile

姓名：趙碩之（Wylie）

三圍：33D、24 、34

背景：拍攝硬照廣告被經理人Angus發掘，其後參演青春劇集，開展演藝里程，曾拍攝電視劇《盛裝舞步愛作戰》、《絕代商驕》及《親密損友》，電影《關人7事》、《死神傻了》及《我要做模》等。

口述：趙碩之　筆錄：影視組