區文詩學亡父送鑽飾

歌手區文詩(Angela)的「賣飛佛」就是耳上逾2卡的鑽石耳環,這對耳環除名貴外,也極具意義,皆因是亡父送給她的最後一份生日禮物。原來區父自女兒18歲開始,每年都會精選一份鑽飾作為生日禮物,她說:「爸爸嘅意思係鑽石唔使係男朋友送,希望個女唔好因為恨收鑽石而心急嫁人,而且鑽石可以保值,比其他禮物更具價值。」

Angela記得18歲生日那年,爸爸送贈的第一份鑽飾是碎鑽戒指,往後陸續收到手鏈、頸鏈、耳環之類,而且卡數隨年紀遞增。至於這對逾2卡的鑽石耳環是患癌父親在過身前為她準備,她傷感地說:「爸爸嗰時病重,但佢仲記住要買生日禮物畀我,聽媽咪講,爸爸買咗呢對耳環,打算喺我生日時送畀我,點知爸爸等唔到我生日就離開咗,由媽咪代送。因為咁,我日日都戴住,洗頭都唔會除,怕唔見咗。」

Angela透露無名指上的鑽戒亦是爸爸所送:「卡數只得50份,但我覺得係好貴重嘅禮物。」並稱自父親送鑽石給她後也漸漸愛上鑽石,希望將來有兒女時也倣效亡父,每年送鑽石給兒女,寓意對他們的愛永恒不變。

Angela戴上亡父送的鑽石耳環,遙寄哀思。