唐詩詠兜錯路

情路上撻Q再撻Q，31歲的唐詩詠撻到變成剩女，令人感到最敗北是與崔建邦之間的關係，令她無心戀戰，拖住玩拉布對唔住自己，分手又棄之可惜。既然是雞肋，詩詠把心一橫斬纜，撇脫瀟灑一次。畢竟曾深愛崔建邦，連詩詠也不禁說：「我哋仲係好朋友，冇可能Delete呢個人，過去嘅事唔想提，向前看會比較好。」兜兜轉轉的關係已令詩詠吃不消，可能是喜愛犯賤，她願從錯誤中學習，感謝每個錯愛過的男孩：「愛情路上一直未搵到Mr. Right，係跌碰過好多次，但感覺都OK，真係學到好多嘢，尤其係兩性之間嘅關係！」

過去經歷未有令詩詠嚇怕，只要喜歡，就有十萬個理由支持自己去愛，懶理抉擇是對是錯：「愛好簡單，愛情係世間最簡單一樣嘢，只要鍾意對方就冇問題，我鍾意得對方，就算做乜都開心，唔需要花巧，亦唔需要物質，開心就得！」拍拖四次即使撻Q，她仍然阿Q：「拍拖四次，總括而然都好開心，因為我唔會記住唔開心嘅嘢。就算係之前一段情（指崔建邦），我冇話唔開心，遇到每一個男友都係我嘅幸運，因為人生已冇乜病痛，第三世界嘅人都冇話慘，我冇理由將不快事無限放大，詩詠已經係好幸運嘅人，凡事要睇兩面。」

享受單身生活

可惜詩詠仍未在對的時間遇上對的人，但她享受盛女生活：「隨緣！緣分唔搵我都冇辦法。反而單身可以做到更多嘢，做自己想做嘅事，我會將剩女變成盛女，做盛女幾好吖！唔一定要同男友去旅行先開心，同班女仔去玩仲過癮，要知道豐盛人生唔單只有愛情，我依家好開心！」詩詠篤信愛情隨緣，工作亦然，她知道甚麼叫「冇咁大個頭就唔好戴咁大頂帽」：「唔知自己有冇野心，想做個好演員，唔想畀人睇死。當年入行，朋友覺得我太怕醜，一定做唔到，就係咁我更加要做落去，直到呢個圈唔需要我！」

固執金牛女

詩詠是一個喜歡研究星相命理的人，身為金牛女的她對自己有這番闡述：「唐詩詠係一個好典型嘅金牛女仔，好固執、硬頸同爛瞓。佢好樂觀，但又悲觀，係一個好矛盾嘅人！」好一句矛盾的人，說穿了為何她樂於在情路兜兜轉轉。