黎諾懿80後瘋情模敵手

模型一向都是大部分男士的至愛珍藏，他們願意花費大量時間、心思砌模型。無綫藝員黎諾懿亦收藏了大量的模型公仔，多年來已花費約20萬元，原來瘋狂收集模型背後，只是為了彌補兒時未了的心願。

無綫藝員黎諾懿原來是「模型癡」，他笑言自己不愛名車，獨愛模型，家中到處都是他珍藏的至愛模型，問到哪一個模型才是他的最愛？他坦言是聖鬥士：「我最鍾意聖鬥士，因為細個我好鍾意睇佢嘅卡通片！」他對模型的愛不單只是儲存，對於模型的出廠年份更十分有要求：「依家我儲嘅聖鬥士都係八十年代嘅日本版，盒上都印有出廠年份，就算當年出產嘅模型，冇依家新版嘅質素咁靚，有啲瑕疵，我都一定要買八十年代版！」

迷卡通玩到爛

為何黎諾懿獨愛八十年代版的模型？原來為了彌補童年時的心願！在屋邨長大的他，小時候因父親患癌離世，全靠母親獨力工作來養大三兄弟，他坦言玩具於童年時代是奢侈品，更遑論要求母親買玩具：「我哋有錢都攞嚟食飯啦！仲點敢叫阿媽買玩具？冇玩具玩係正常o架！當時一隻模型都要賣成二百幾、三百蚊，對於我哋家庭嘅負擔好重！」而他童年最大的娛樂就是看卡通片，亦導致他迷上模型：「例如聖鬥士星矢、黃金戰士、高達等等，當呢啲卡通人物推出模型嘅時候，我真係好想有一隻！」

斷Job計逐隻買

童年時代的黎諾懿若要買模型便全靠自己「死慳死抵」、一蚊一毫地儲回來：「我儲一、兩年利是錢先儲夠錢買一隻模型，不過細路仔唔識珍惜玩具，一定會玩爛，所以我大個咗就好想要一隻完完整整、冇爛嘅玩具！所以依家我買番嚟嘅聖鬥士模型，都冇拆開過。我堅持買八十年代版，滿足番我童年時代嘅願望！」

問到黎諾懿花費了多少錢在模型上？他說：「都有十幾、廿萬o架！因為單單一隻就要賣成七百幾、八百蚊港紙，我今次只係Show咗黃金聖鬥士，但其實佢仲有好多系列，例如冥王鬥士、海鬥士、冥鬥士等等，真係好似永遠都儲唔完咁，不過我都係逐隻逐隻買番嚟儲，如果一次過買晒就真係不得了，我都係每次接到一份Job就買一隻模型當獎勵自己！」

黎諾懿除了收藏聖鬥士以外，亦有收集高達、黃金戰士等的模型，當小記誤以為黃金戰士中的黃金俠可化身為一個普通盒子的時候，他立刻緊張地糾正：「黃金戰士嘅成員都可以化身為唔同嘅工具，例如鉛筆刨、電筒、打火機等等，今次我帶嚟嘅隊長黃金俠就可以變成打火機！」收藏量豐富的他原來仍有未了的心願：「其實我仲想買超時空要塞嘅模型，不過佢推出嘅數量好少，而且被人炒得太貴，所以我都未買住！」