學友寶刀未老舞出火花

歌神張學友前晚於香港開騷，雖然已年屆50歲，但他唱快歌時毫無問題，他亦自覺比以前跳得更好，坦言開心死！

歌神張學友前晚為合共10場的《1/2世紀巡迴演唱會》最終香港站揭開序幕，唱出多首經典金曲。學友向前輩沈殿霞（肥姐）致敬時，感激對方常給予幫忙。他又大騷苦練多時的一字馬，不忘叫粉絲不要亂學：「真係唔講得笑，呢啲動作唔好學，筋骨硬做會好危險！一陣（做一字馬屈膝）落咗去上唔番嚟就唔好，我都練咗好耐o架！」

見觀眾走來走去

當學友唱Jazz（爵士音樂）時，他笑言見到不少觀眾走來走去：「我唱嗰陣瞇眼見到好多人行嚟行去，爵士音樂係我首次嘗試，接受唔到都正常！」他自爆今次唱多了慢歌：「如果有瞓着嘅朋友麻煩頂一頂，之後會唱快歌，令大家喺睡夢中驚醒！」

當學友表演連串勁歌熱舞時，大屏幕亦播出他的陳年MV，盡顯「今昔對比」：「我跳得同以前一模一樣，唯一分別係我跳得好過以前！到呢個年紀覺得有進步，真係開心死我！」惟他唱至尾聲時有少許失準走音。