「賭神」發哥Catwalk舞得頂

周潤發前晚以代言人身份在北京為時裝品牌壓軸行騷，適逢當晚是他57歲生日，難怪全晚風騷不已，又與嘉賓之一的劉嘉玲擁抱錫面。

周潤發前晚與太太陳薈蓮出席時裝品牌HUGO BOSS在北京舉行的《BOSS Black Fall/Winter 2012 Fashion Show》。身為該品牌首位亞洲代言人的發哥壓軸行騷，而當晚亦是他的57歲生日，難怪風騷不已。其他嘉賓包括劉嘉玲、吳尊、張赫、世界小姐張梓琳、國際巨星泰迪史雲頓（Tilda Swinton）、Georgia May Jagger、Matthew Goode和China Chow等（周佳納）。

祝福鞏俐

穿玫瑰紅西裝、梳賭神髮型的發哥走上天橋的一刻，全場嘉賓起身鼓掌，他邊行邊揮手，還走向坐在觀眾席的劉嘉玲面前，與她擁抱兼錫面！其後搞鬼地加入舞蹈動作行Catwalk，掀起高潮。大會播放生日歌賀發哥牛一，品牌亞太區總裁Dr. Gerrit Ruetzel更送上生日卡。

發哥被讚似賭神般有型，他即摸摸頭髮說：「我似甄子丹，佢都成日着紅色踢死兔。」他透露發嫂送了香吻和心作生日禮物。問到生日兼做代言人可會覺得雙喜臨門？他即笑稱5月18是好日子，可能品牌都信風水。在旁的發嫂則說：「咁啱啫！（送咩畀發哥？）日日對佢咁好。（知鞏俐已離婚三年？）冇聽過，咁我都祝福佢！」另外，甘國亮昨日透露發哥答應擔任其節目嘉賓，也很喜歡他為其度身訂造的電影劇本。

劉嘉玲對於鞏俐已離婚三年，亦表示不知情：「呢個婚姻結果（離婚）令人唏噓！係命運，呢啲嘢只有兩個人自己明，第三者唔可以講啲乜，祝福佢快啲搵到另一段開心婚姻生活。（傳佢哋各有各忙而分開，驚同偉仔都係咁？）每一對都情況唔同，（你哋點維繫？）梗有維繫方法啦！」