袁彌明扮蟹蝕幾十萬
娛圈不少藝人都有投資股票，可是恒生指數昨日一度狂插578點，最終下跌249點，收報18,951點。自言有投資股票的袁彌明表示，現今仍有蟹貨在手，但絕不擔心蝕到渣都冇：「我依家仲揸住期指同金，粗略估計帳面蝕幾十萬，不過我就唔太擔心，覺得今年個市唔會跌到剩番萬頭呢個水位。」
有指鄭少秋新劇將於後晚首播，「丁蟹效應」再現，秋官認為自己套劇一播出，股市便會升，他說：「如果個市真係會上番嚟，我都會執番啲，因為有句名言『水則資車，旱則資舟』，執平貨有何不妥？」
楊思琦投資向來以穩陣見稱，只買磚頭保值，她笑言股市波動是受「丁蟹效應」影響：「秋官套劇就上，唔知點解次次都咁邪會跌市！」黃德斌則表示雖然冇股票揸手，但提醒港人要小心入市，而馬國明則表示已沒有股票揸手：「前年輸得甘，失六位數字，依家寧買磚頭好過！」
袁彌明表示有蟹貨在手，估計帳面蝕幾十萬元。