Teresa情長等足阿倫16年

譚詠麟（阿倫）及杜麗莎（Teresa）首次合作的紅館演唱會反應熱烈，二人因避「飛債」而被迫關電話。主辦單位宣布加開兩場，令他倆終可鬆一口氣，難怪他們大聲同呼「得救」！

阿倫及Teresa將於7月20至23日假紅館舉行《譚詠麟 杜麗莎Time After Time演唱會》，兩大樂壇殿堂級歌手首次合作開騷即掀起搶飛潮，據知首日開售已賣去九成門票。日前二人受訪時坦言不停收到「奪命追飛Call」，煩得要關電話，阿倫更大爆有朋友一口氣訂160張飛，令他相當頭痛！Teresa亦訴苦：「我邊有多飛？我只係有四張留畀至親，我同朋友講我有心無力。」當二人知道加開24及25日兩場後，阿倫抵死地說：「其實嗰兩日我約咗人踢波同跑馬，不過見歌迷咁捧場，我惟有取消啦！」

音樂合作第一次

阿倫和Teresa相識逾三十載，雖然兩人早已互相欣賞，可惜機會合作不多，阿倫說：「同Teresa合作過電影，佢做我家姐，音樂上冇合作過。」Teresa說：「都成16年前嘅事，今次合作開騷，我覺得佢係我等咗16年嘅男人，之前我同林子祥出咗一張所謂合唱碟，其實係分開錄音，所以音樂上正式合作嘅男歌手，阿倫係第一個！」

問到合作可有趣事？Teresa表示有一次她化妝Set頭，阿倫擔心她肚餓，親手餵她食蝦餃。問到知否有傳Teresa性格火爆？阿倫力撐她平易近人：「可能佢講嘢好直，要求又高，外界先有誤解啫！」而Teresa對「惡婆」之名毫不介意，並指被人誤會全因她擔任無綫節目《超級巨聲2》評判時「隱善揚惡」：「我有對參賽者好言相勸，但有啲人只播我鬧人嘅片段。」