趙碩之 搵吳啟華交心

趙碩之（Wylie）首次拍拖即遇上劈腿男，幸好當時只有17歲的她醒目即撇。不過她指若再遇相同情況，未必能像當年灑脫：「要睇自己有幾鍾意個男仔。」

向來以性感見稱的趙碩之，近日與歌手關楚耀、吳啟華及台灣藝人趙彤等合作亞視劇集《親密損友》。

提初戀激氣

劇中遭老公背叛劈腿的Wylie，直言現實生活亦曾嘗被背叛滋味，對方更是其初戀男友：「嗰時我17歲半，第一次拍拖，突然有幾個月個男仔唔睬我，後尾我先知佢同咗第二個女仔一齊。我當然好傷心，但最激氣係個男仔解釋話唔關佢事，係個女仔主動，我仲嬲！心諗你個衰人，咁都講得出，我梗係唔會再同佢一齊啦！」問到若他日再遇負心漢，會否如當時一樣斬釘截鐵？她卻說未必：「要睇吓有幾鍾意個男仔，如果好鍾意，就算佢點對你唔好，你都有辦法幫佢搵藉口。」

不少人指與吳啟華合作獲益良多，Wylie亦大表贊同：「佢無論戲裏戲外都係我嘅心理醫生，拍劇嗰排我有啲感情問題，我都有私下問啟華點解決，畢竟佢人生閱歷豐富好多，而佢亦好好，畀咗好多意見我。」

當趙彤係妹

另一個讓Wylie難忘的拍檔是趙彤，她說：「個個都好錫佢，我都唔知點解，總之當佢係妹咁，會買埋早餐畀佢食。我都好少拍嘢咁開心，日日好似返學咁，演員之間嘅感情真係好好。」