汪詩詩甘做子丹後盾：娛圈唔啱我

踏入銀色星途是不少少女的夢想，憑選美及模特兒大賽入行的汪詩詩，明白自己不適合吃娛圈這行飯，還是樂於做「宇宙最強」背後女人。

喺成為甄子丹太太之前，我都算係半個娛樂圈嘅人，19歲就喺加拿大參加多倫多華埠小姐比賽奪冠。之後返香港探親，當時Elite舉辦模特兒比賽，我向來對模特兒呢行有興趣，但一直苦無入行機會，決定趁呢個好機會參加，雖然有朋友認為我係選美冠軍，走去參加模特兒比賽有失身份，但我鬼妹仔性格唔介意，一心想學多啲嘢，雖然最後冇贏到（註：當年由陳碧舸奪冠），不過對我嚟講勝負唔係重點。

拍戲遇上巨星

比賽之後，我拍咗唔少電視同平面廣告，亦同歐陽妙芝、李嘉慧行過騷，仲拍過一千零一部電影，就係《絕世好B》，成個過程都好開心，第一次拍戲就可以同古天樂、劉青雲、張栢芝合作，但亦因為呢部戲令我明白影圈、娛圈唔啱我，因為拍戲經常要等，無論係主角定配角都一樣，但我性格係唔等得，而且做明星要成功太辛苦，所以我嘅娛樂圈生涯就此止步。

之後我轉咗去做家族生意，因為屋企人做珠寶店，我對珠寶設計有興趣，而且我鍾意自己話事同創作，完成一個Project有好大滿足感。不過冇幾耐我就結咗婚生埋小朋友，我嘅主要工作就變為家庭主婦，同管理子丹嘅電影公司。

打理屋企與公司

但我唔會做子丹經理人幫佢接工作喇，因為我對電影認識唔多，唔夠子丹熟悉，我比較適合做管理工作，管理家庭同公司。近年我有個新計劃，就係想借子丹嘅小小知名度去回饋社會，我哋籌備緊一個網站，叫go asia，巿民可以透過呢個網站去搵義工做，只要輸入時間同地點就可以，地點唔限於香港，係全亞洲嘅慈善機構，希望可以做多啲慈善工作。（全文完）

後記：Home Sweet Home

在整個訪問中，可以感受到汪詩詩是一個被愛包圍的幸福女人，她與家人的感情真的十分要好，連自己也形容為太多愛。詩詩並非空口說白話，正如受訪當日，父母早已在外面等她，三人約好去圓圓擔任示範模特兒的活動撐場，如此齊心的一家人確實少見。

口述：汪詩詩　筆述：名人組