汪詩詩管老公錢：壓力好大

婚後的甄子丹事業發展愈見出色，身為賢內助的汪詩詩自認也有功勞！詩詩雖掌管財政大權，但她未敢胡亂花費，以免浪費老公血汗錢！

我同子丹喺03年結婚，佢婚後第一齣拍嘅電影係《殺破狼》，亦因為咁而認識黃百鳴。佢對子丹嘅電影事業幫助好大，呢部戲得到好好反應，之後子丹嘅片約就一部接一部冇停過，由《葉問》開始，人氣仲愈嚟愈勁！

好多人話我腳頭好、旺夫，我認為每個人事業都有高低潮，只係我啱啱遇上子丹嘅事業高潮。子丹嘅成功係靠自己，靠喺電影圈三十年累積嘅經驗同對電影嘅專注，仲有好多電影人嘅努力。當然我唔否認幸運亦係其中一個因素，可能我係佢嘅幸運源頭，因為家庭婚姻美滿，令佢無後顧之憂，心情好就自然好事來，所以我都應記一功，哈哈！

挑戰搞笑 成功改變

子丹同我講過，90年代中係佢嘅事業低潮，1998年投資咗一部電影《殺殺人，跳跳舞》，係一部低成本製作。我睇過覺得唔錯，可惜當時票房好差。對我嚟講，《葉問》係一部成功電影，但子丹戲中嘅角色同佢平時太似，所以驚喜唔大，反而佢喺《八星抱喜》嘅演出令我意想不到！雖然平時喺小朋友面前就係咁搞笑，但子丹係一個好保護自己嘅人，冇諗過佢會將呢一面畀觀眾睇，仲可以做得咁放。子丹接拍之前都有問我意見，問我如果佢做喜劇會點？我話一定冇問題，最後佢決定挑戰自己，我覺得呢個係唔錯嘅改變。

拒炒股票 最愛磚頭

《葉問》令子丹走紅，但對我哋嘅家庭生活同生活質素都冇大改變。我哋唔係嗰種賺好多錢就用得好離譜嘅人，唔會買私人飛機或者遊艇，總之夠用就得，就算依家我仲會同子丹着住拖鞋去食麥當勞。子丹太忙，佢會將所有錢放手畀我處理，我知道佢賺嘅係辛苦錢，一分一毫都有血有汗，所以我壓力好大，理財方面我好小心，一定唔會掂股票投機，只會買物業投資。

好多人話賺夠幾多錢就會退休，子丹都曾經講過想退休，但只係戲言，佢從來冇諗過賺夠就唔做，因為佢太熱愛電影，就算佢唔做幕前，佢都會做幕後，一定會從事同電影有關嘅工作，總之永不言退！（明日待續）

口述：汪詩詩　筆錄：名人組