冧歌賀周年感動到喊

婚後子丹對我好好，做過無數令我感動嘅事。結婚初期，佢忙住拍《殺破狼》，晚晚開夜班，大家幾乎見唔到面，我當時太唔成熟，唔識體諒佢，曾經投訴佢太忙。原來子丹打到周身傷晒，但為免我擔心，所以唔敢畀我知，其中難得有幾日假期，子丹都冇休息，佢為咗準備我哋結婚一周年嘅禮物而去咗錄歌，但佢一直冇同我講。

一周年紀念當日，子丹喺酒店嘅餐廳訂咗枱同我食飯，飯後我哋返上酒店房休息。一入房就播起呢首歌，首歌由佢親自作詞主唱，內容有關我哋嘅經歷。當我聽到首歌，我感動到喊！當時子丹拍戲拍到天昏地暗，但依然咁有心做咁多嘢氹我開心！

子丹外表大男人，但實際上好細心，一心對你好，唔會畀你知佢有幾辛苦。每逢特別節日佢都記得，就算幾忙都一定同我慶祝，又會製造驚喜。

Profile

姓　　名：汪詩詩（Cecilia）

出生日期：1981年4月21日

入行經過：2000年多倫多華裔小姐冠軍

婚姻狀況：2003年與甄子丹結婚，婚後育有女兒Jasmine及兒子James。