汪詩詩無悔嫁子丹:我好幸福

曾立志成為職業女性的汪詩詩,因為甄子丹的出現而打亂人生大計,兩人拍拖僅兩周,子丹便閃電求婚,詩詩更未婚有孕,愛得轟烈!表面硬朗的子丹,在詩詩心目中是個文武雙全的柔情鐵漢,絕對是宇宙最好的老公!

未識子丹之前,我諗住做一個職業女性,30歲後先會考慮結婚,但因為子丹嘅出現,令我整個人生好大改變,未夠30歲已經成為一對仔女嘅母親,我只可以講一切都係緣分。

我同子丹第一次見面係喺香港嘅Dragon-i,由朋友介紹認識,佢係一個好少出嚟玩嘅人,嗰時我已經隱約覺得佢同其他男人唔同,有預感佢可能係我將來嘅老公。初時子丹好保護自己,我問佢係做咩職業,佢話做娛樂圈,但就冇講明係做演員,而我唔識中文,亦好少睇香港電影,所以唔知佢係明星,亦冇追問落去。直至有次去佢屋企,見到有佢做封面嘅雜誌,佢先有少少怕醜咁同我講,佢係一個演員。

我同佢正式拍拖係喺美國,當年我只有22歲,年紀同佢相差18年,但我同佢一齊,完全感覺唔到年齡差距,後來知道佢真實年齡後,我都嚇咗一跳!拍拖兩星期後,子丹已經買咗戒指向我求婚,雖然大家相識時間唔長,但就好似識咗好耐咁。我知道呢個男人唔會傷害我,佢會保護我,佢係一個好正直嘅人,我相信佢,於是一口答應同佢結婚。之前有好多男仔追我,但都畀唔到我呢個感覺,我知道子丹就係我嘅Mr. Right。

文武雙全見專一

拍拖以來,印象最深刻係有次去佢屋企,我見到個鋼琴,我問佢你係咪識彈琴,佢話少少啦!我係「十級」鋼琴,當然想晒吓嘢,所以就即場彈咗首曲,但我太耐冇彈琴,所以只係彈咗首五級程度嘅曲。我彈完之後話到你喇!點知佢竟然彈咗首「十二級」程度嘅曲,我當場呆咗。當時我覺得佢唔單止係一個識打功夫嘅人,原來都好有內涵,但就從來唔會表現。我係一個學琴嘅人,知道箇中辛苦,後來我從奶奶口中知道,子丹以前每日凌晨四點起身練功夫,練到夠鐘就返學,放學又再練過,從學琴、練功夫兩方面可以反映出子丹係一個好專一嘅人,無論做任何事都唔會半途而廢。

父母曾棒打鴛鴦

當我通知父母我要結婚嘅時候,佢哋好反對,因為子丹係做娛樂圈,加上佢係一個結過婚、有小朋友嘅男人,媽媽一直教我點拒絕子丹,爸爸就建議先訂婚一年再算。但求婚之後,子丹就專程飛去加拿大見我父母。見到子丹之後,爸爸媽媽都對佢改觀,覺得佢係一個負責任、有學識嘅男人,尤其我嫲嫲,佢閱人無數,佢同我媽咪講,子丹係一個好男人,會對詩詩好,佢嘅外表硬朗,但內心好善良、溫柔。

正當我哋籌備結婚嘅時候,我就發現自己有咗,可以話係意料之內,又係意料之外。其實當我哋打算結婚一刻開始,我已經決定要為子丹生兒育女,因為子丹年紀唔細,我唔想仔女同佢嘅年紀有太大距離,只係冇諗過會咁快。由結婚到依家差不多八年,我從來冇對當日嘅決定感到後悔,由始至終都認定呢個男人,覺得當年嘅選擇絕對正確,我可以好肯定咁講,我係一個好幸福嘅女人!(明日待續)

口述:汪詩詩

筆錄:名人組

 攝:沈健程

汪詩詩因子丹而打亂人生大計,但她仍無悔閃婚,皆因早已認定對方為Mr. Right。

詩詩與子丹拍拖兩周即答應求婚,更在籌備婚事期間懷孕。

去年詩詩30歲生日,一家四口在酒店開P慶祝,相當溫馨。