吳若希 混種Honey有家教
歌手吳若希（Jinny）飼養混種狗Honey及雪橇犬Moon，她經常帶Honey受訪，令牠成為見報率頗多的明星狗。
現年三歲的Honey愈大愈可愛，Jinny還將與Honey的合照相製成郵票款，上載至微博晒幸福。Jinny表示與Honey相遇是緣分：「三年前同朋友去大帽山行山，見到出世冇耐嘅Honey遭遺棄，佢當時成身泥好污糟，見佢咁可憐，但眼仔睩睩咁得意，就決定收養佢，因為佢毛色係蜜糖色，所以改名做Honey。」她覺得名種和混種狗無異，同樣是人類的好朋友，與Honey相處後，她更覺混種狗比名種狗忠心及更具靈性：「Honey好嗲，可能佢係女仔，會成日黐住我，佢好乖，唔會亂吠或亂咬人，有次朋友帶隻貓探我，Honey竟然坐喺隻貓身邊，好友善咁望住佢，我覺得好神奇，可能我好家教啦！哈哈。」
吳若希讚愛犬Honey超乖，會陪到訪的貓客。
Honey眼仔睩睩，深得吳若希歡心。