瑪姬「游」馬國 最驚頑猴搶膠袋
新城DJ瑪姬早前到馬來西亞旅遊勝地浮羅交怡自駕遊，飽嘗美食及玩盡水上活動，她說：「其實好怕曬黑，已經狂搽防曬，但都曬到啲泳衣印一撻撻，好肉酸。」她表示因得聞浮羅交怡美如世外桃源，故怕曬仍覺值得一去。
問到可有艷遇，瑪姬笑說：「一向旅遊都唔會有艷遇，但有人讚我件泳衣靚。」她推介準新人可到四季酒店一遊，既有私人沙灘，亦是影婚照的好地方：「間酒店又大又靚，有廿幾個靚位影相，而且人少，點影都得。」她又提醒到孕婦島的遊客要小心猴子：「可能啲猴子以為膠袋有食物，所以佢哋好鍾意搶遊客啲膠袋。」
