李曼筠 崩潰

以身材突出見稱的「動漫Maggie」李曼筠，年紀輕輕，理應是樂天少女，近年專注事業瞓身搵錢的她，卻付出「搵真銀」的代價！早前因工作壓力以致暴瘦，最近北上開工又疑似「撞鬼」，身體出現奇怪傷痕，導致情緒失控！

返港失眠 成日喊

李曼筠早前北上賺人仔，兼首次擔正內地靈異電影主角，挑戰演技，與歌手關智斌合演夫婦，她表示壓力甚大：「個角色好似有雙重性格咁，一方面好堅強，一方面又想依靠老公，因為要配合片名《半夜不要照鏡子》，所以角色性格都好似鏡前鏡後咁，有兩面，而且有好多恐怖經歷，會成日喺鏡入面見到啲恐怖片段，一時見到屋企人畀鏡插死，一時又見到自己被鬼監生扯開，所以拍嘅時候，我精神壓力都好大！」

首次孭重飛，Maggie自然格外投入演出，不料過於投入，返港至今仍未完全抽離角色，不時感到異常空虛，徹夜難眠，她說：「拍完戲返香港，心情仲成日好反覆，有時一個人喺屋企睇番喺內地拍攝嘅花絮相，就會無啦啦喊唔停，仲會成晚失眠，覺得好空虛寂寞！（太投入角色？）可能係，因為戲入面嘅角色情緒起伏好大，喺上一秒鐘我要扮到好堅強，但下一秒就喊到崩潰，就算導演嗌Cut，我都仲喊到收唔到聲！」

Maggie坦言拍攝電影時感疲累，工作環境的差異令她最難適應：「其實拍靈異電影前，本來拍緊飲食節目，成日可以遊山玩水，又可以食好嘢，真係好開心，但係去到拍電影時精神壓力好大，情緒直情好似坐過山車咁，真係差啲精神分裂！」

隱瞞家人 拒求醫

雖然受困擾，但性格倔強的Maggie不願向外界求救，問到會否向心理醫生求助，她斷言：「現階段冇必要搵心理醫生，其實我覺得每個人都有雙重性格，依家我可能只係另一個性格走咗出嚟，所以先會咁悲觀！」Maggie坦言連家人都不知情：「同屋企人只會報喜不報憂，一定唔會同父母講我情緒受困擾嘅事，細佬都完全唔知，就算喊，我都會閂埋門喊，唔想畀屋企人知！」

除了精神上的困擾，Maggie身體亦離奇地接二連三出現傷痕！受訪當日，Maggie發現胸口對上像被煙頭灼傷，她說：「今朝瞓醒去廁所梳洗，一照鏡就發現心口附近好似畀嘢『辣』損咗，但又完全唔痛喎！我冇印象幾時整到，之前隻腳又係咁，無啦啦瘀咗！」雖然她還識講笑，笑言要於家中安裝閉路電視，但又忍不住開始疑神疑鬼：「我懷疑係咪畀人落咗降頭！一定係用針拮兼用錘仔打我，如果唔係身上點會有咁多傷痕？」

Maggie早前因雙腳無故出現瘀傷，為求拍攝安心，曾尋求高人協助，結果求得的辟邪鏈卻於開工現場斷掉，問到會否再找師傅指點迷津，她只說：「既然之前搵過都冇用，依家對於求神拜佛嘅解決方法都冇咩信心！」問到會否想盡快找位男友保護？單身的她說：「覺得冇咁嘅需要，其實我都好獨立，同埋男人都唔一定可靠嘅！」現階段Maggie坦言不會尋求任何幫助，寧願自己「慢慢調節」，寄望時間可淡化一切。

後記：宜找紓壓渠道

從來都不愛蒲、不愛行街Shopping的Maggie，閒時只愛留在家中與愛貓獨處，或玩手機Apps打發時間，她亦自認生活苦悶，未知是否欠缺抒發渠道，今次她才會將自己逼向壓力爆煲的邊緣！其實做做運動有益身心又可紓壓，小記希望Maggie亦可盡快找到適當抒發情緒的方法。