陳嘉桓不能說的媽咪

「親恩應該報，應該識取孝道」，永恒的念親恩，帶出母親節意義所在。在這普天同慶的日子，陳嘉桓（Rose）終可名正言順與母親過節，以侍母至孝成為終生理想；21歲的何思諺（Leanne）也不再孩子氣，還學習做一個好媽媽，讓愛兒他日成材，柔柔的在她耳邊說一聲：「媽媽，我真的愛你！」

陳嘉桓（19歲）

母親︰Ronnie

問︰今年母親節係咪比過往特別？

Rose︰以前因媽咪身份問題（前經理人）比較低調，依家就只得一個身份，就係我媽咪。好多人見到佢都會話：「呢個係Rose媽咪喎！」由細到大我哋都冇代溝，咩都攞出嚟傾。

問︰今年母親節點過？

Rose︰會請媽咪同婆婆食飯，再喺屋企整甜品畀佢食，知佢鍾意食西餐，鍾意有情調，好似鋸扒、食鵝肝，今日提早帶佢嚟食。

問︰以前有冇送過特別禮物？

Ronnie︰冇禮物又冇請食飯。

Rose︰我以前細個冇能力，小學有送過自製卡畀你，可能你唔記得咗啦！

問︰會點報答母親？

Rose︰佢好偉大，我會再乖啲。

何思諺囝囝︰杜卓霖（Jasper）

年齡︰約2個多月

問︰首次過母親節感覺係點？

答︰雖然自己得21歲，已覺得大個咗，做咗媽媽責任幾大，依家咩都會以囝囝為先。

問︰母親節會點過？

答︰今年會四代同堂，約埋媽咪同外母一齊開開心心食飯，當然會影相留念啦！

問︰囝囝差唔多3個月大，佢成長成點？

答︰佢已經13磅好重磅！佢真係好擦得，定時定候就會喊，話你知「媽咪我夠鐘飲奶」，好似鬧鐘咁。

問︰復出但會唔會減少工作量？

答︰我會拎個平衡，做嘢就會畀媽咪湊，但做完嘢一定會即刻去見囝囝！

陳倩揚囝囝︰陳羲廷

年齡︰約1歲

問︰首年過母親節感覺如何？

答︰感受都幾深，囝囝識叫媽媽喇，已經係最好嘅母親節禮物，最緊要小朋友身體健康。

問︰母親節如何度過？

答︰當日雖然要做嘢，但放工後會同媽咪、囝囝三代同堂慶祝。

問︰覺得囝囝成長如何？

答︰佢模仿能力好高，已經識拎迷你水壺飲水！佢係思索型，學嘢都幾快，但我唔會逼佢學嘢，順其自然發展啦！

徐淑敏囡囡︰Vianna、Renee

年齡︰2歲3個月（Vianna）、8個月（Renee)

問︰今年母親節點慶祝？

答︰約埋媽媽、奶奶同大女Vianna、細女Renee拍全女班寫真，老公揸機操刀。

問︰做咗母親感覺係點？

答︰當時完全冇做媽咪嘅Concept，到Vianna慢慢大個，第一次嗌我媽媽，我先知自己係真正嘅媽咪，責任好大，要好好教兩個女。

朱凱婷囡囡︰Sheryl　年齡︰約5個月大

問︰第一次過母親節，覺得點呢？

答︰因為四代同堂，我、囡囡、媽咪同婆婆可以一齊慶祝，感覺好特別！

問︰為人母親後有咩轉變？

答︰做媽咪真係好偉大，依家除咗做嘢外，就主力同老公湊女，以前非常冇耐性，但依家明白要無條件付出。

問︰點教導女兒？

答︰我會教佢有禮貌，而且避免佢哋有過量嘅資源、選擇、物質同愛，要佢哋學懂珍惜。