羅力威急降關係

英皇歌手羅力威的緋聞女友羽翹不被粉絲接受，更以「Cheap精」來辱罵，羅力威更將兩人關係降級，由前日口中「發展緊」急變做「唔關事」！

明日母親節，羅力威昨日與泳兒、江若琳（Elanne）及陳柏宇等出席電台《香江暖流．愛母親》活動，在樂富向街坊大派康乃馨。前日才透露與羽翹「發展緊」的羅力威，竟急急轉軚：「佢係女性朋友，我冇女朋友，不嬲冇認！」羅力威一名師奶級粉絲匿在人群中，聽到偶像被追問到羽翹表示想30歲結婚即辱罵：「威威，唔好講佢，Cheap精！」羅力威即說：「佢還佢想……（關唔關你事？）（停頓好幾秒）唔關事！」該粉絲又讚他答得好，見他面露尷尬神色。對於粉絲不接受羽翹，羅力威說：「我自己話事，雖然意見都會聽，目前事業為重！」

泳兒帶媽咪落老蘭

另外，泳兒及Elanne都跟媽咪提早慶祝母親節，泳兒前晚帶母親落蘭桂坊豪食日本菜：「兩母女二人世界，食咗幾千蚊！（帶髮型師男友同行？）佢都冇叫我同佢媽咪食飯！」至於Elanne今晚會在家中打邊爐，她說：「我會親自去街巿買材料，仲會買蛋糕！（禮物呢？）過往買畀媽咪嘅禮物，佢都唔捨得用，好嘥錢，陪佢食飯已經好開心！」