丁子高趁千嬅生B裝修5日

丁子高前晚出席活動時透露，全家已預備好老婆楊千嬅隨時入院生龍B，又預告入產房時會以歌聲支持老婆！

天后楊千嬅預計下月生得，老公丁子高前晚出席品牌活動時透露，全家已Stand By迎接新生命：「依家屋企個廳擺滿BB用品，只要千嬅一入產房，我哋就會即刻裝修間BB房，仲一定要喺5日內完成，所以裝修師傅都好似《On Call 36小時》咁要隨時Stand By！（執好奶粉袋未？）執好晒，隨時都行得入院，依家媽咪、工人、陪月亦都係隨時Stand By！」

唱《寒冰掌》助產

至於會否在產房內拍片及剪臍帶？丁子高即自爆怕血：「唔會喇！朋友叫我千祈唔好望住BB出世嗰刻，我會望住千嬅對眼，同唱歌分散佢注意力（唱你首《寒冰掌》？）好提議，不過我怕自己都頂唔順！」昨晚千嬅在微博上載大肚照，並表示到超市買西瓜時，有售貨員搞笑指西瓜像她的肚子一樣大。

至於同場的吳彥祖則坦言心急有下一代：「好友都陸續生B，自己都心急！（想生仔定女？）冇所謂，不過仔易Handle啲，如果個女十幾歲時拍拖，到時開門見到個男仔都唔知點算，因為我都知嗰個年紀嘅男仔諗乜！」他又笑言怕將來會變成呷醋外父。