陳僖儀難忘被飛作歌唱舊愛

圈中唱作歌手甚為難撈，但樂壇新人陳僖儀反而銳意加入戰團，憑歌寄意唱出感受，將情傷寫在歌中，藉此把記憶由腦海移至音符中，抹走傷痛！

熱愛唱歌的陳僖儀（Sita）不但樣靚聲甜，原來亦是「作得」之人，她自言腦袋充滿鬼主意，更將靈感放入唱片中，一嘗創作夢！她自爆因諗頭多多而經常失眠，更因掛住「諗新橋」而忽略朋友︰「我係靈感派，行街諗到就用電話錄低，有次游水突然諗起首Melody，即刻上水返更衣室錄低，真係幾誇張！」

暫不再拍拖

談及親自作曲的新歌《忘川》，她不忘感謝高層Paco的支持，並透露此歌是記錄過去一段被男友狠飛的經歷，別具意義︰「嗰次畀人飛，希望寫喺歌中，將唔開心嘅事忘記。」問到是否已走出情傷、另覓對象，她說︰「雖然段感情Close咗File，但我係一個好投入感情嘅人，依家唔會交男朋友住。」

Sita坦言社交圈子有限，圈中的男性朋友亦是10隻手指數得盡，故要努力拓展版圖，問到最想認識哪位男星及合作，她甜笑說︰「當然係謝霆鋒，哈哈！我好細個就鍾意佢，覺得好靚仔，佢係我偶像。之前喺首映見到佢，我都唔敢行埋去，好似一個小Fans咁。」