關楚耀玩命 諗起都驚

歌手關楚耀在新歌MV中玩命,先在青馬大橋上冒死狂奔,又爬上樓高30層的大廈危企!他更自薦表演「跳樓」,惟導演以太危險為由拒絕陪他癲!

關楚耀(Kelvin)日前拍攝新歌《我這一代人》MV,導演安排他駕開篷跑車到青馬大橋拍攝,其中一個鏡頭是他跳落車,再在公路上喪跑,由於高速公路上有不少快車,故Kelvin隨時有被車撞倒的危險,幸好他「腳急眼快」,一Take完成拍攝。Kelvin說:「拍呢個狂奔鏡頭要好快,因為唔想阻住其他道路使用者,我都試過畀車響按狂『呠』,不過我冇嚇親!(劇組有冇申請拍攝?)唔知喎!」

其後,導演移師一幢大廈拍攝,當Kelvin到達28樓天台後,爬樓梯到更高的平台處,再危立於稍一不慎就變「空中飛人」的矮牆邊!問到可有膽怯?他說:「都有啲,因為我有少少畏高!我仲企咗成半個鐘,都幾危吓!」

未有埋怨導演

雖然危險鏡頭多多,但Kelvin未有埋怨導演「靠害」,原來他在拍攝前,竟向導演提出更瘋狂的構想:「我諗住玩激啲,提議不如我跳樓!不過導演就話諗吓先,之後就冇咗件事,諗番好在冇拍啫!」他肯為此歌作瞓身演出,全因這是近年最喜歡的作品:「首歌同我以前嗰啲唔同,我專登用把『爛爛哋』嘅聲去唱!」

音樂組

關楚耀重聽錄音,看來頗滿意效果。

玩無可玩,Kelvin爬上天台「危站」,見到都驚。

Kelvin坐在開篷車上,面黑黑得嚟又幾型!