李璨琛闖火山釣魚毛

潮人李璨琛近年迷上磯釣，斥資六位數與好友合資買了一艘價值逾百萬港元的船出海釣魚。他坦言磯釣有危險性，曾試過磯釣期間跣腳險掉落海，幸好最後有驚無險！

潮人李璨琛近年瘋狂迷上磯釣，除每星期相約好友出海釣魚外，更斥資六位數與好友買下價值逾百萬元的船出海釣魚。問到為何如此捨得花錢？他笑說：「租艇出海釣魚，起碼要十幾個人先成行，買咗隻船一星期釣足四日都得。（點解迷上釣魚？）細個已經好鍾意，三年前直頭去到瘋狂程度！有次同朋友去釣魚，過程好靜，可以趁機計劃吓將來，釣到魚又好High又可以請朋友食，一舉三得！」

全副武裝上陣

上月璨琛相約好友到日本的三宅島釣黑毛（魚），他直言是一大挑戰：「我哋要喺東京坐成七個鐘頭船先去到，個島係火山嚟，盛產黑毛，所以我哋特登去釣。不過釣黑毛其實有季節性，我哋去到嗰陣已經係尾聲，純粹碰吓運氣。」他指女友曾跟他磯釣，卻大呻辛苦：「佢話又曬又辛苦又污糟，因為磯釣要凌晨四、五點出發，因為天光嗰刻啲魚最活躍。」他又強調磯釣危險性大，安全裝備十分重要：「要着定救生衣，落雨嗰陣要着防水透氣物料嘅衫，要着釘底嘅磯鞋，抓力勁啲，會冇咁易跣親。我都試過跣親差啲成個人跌落海，好彩我玩開滑板，識得撐開個人頂住先冇事咋！」