祖兒:我係集郵女星

天后容祖兒自封「集郵女星」,今晚的《拉闊音樂會》將以一敵五,她戲言下個集郵目標是謝霆鋒,不怕被Chok王擊倒,還笑說:「我頂得住!」

祖兒前晚戴帽與組合C AllStar綵排《拉闊音樂會》,她將與5位歌手在音樂會上合作演出,她說:「我係『集郵女星』,過往曾經同肥陳(陳奕迅)、李克勤、張信哲、草蜢、黃耀明同古巨基演出。(好少集郵女星?)咁男同女一齊好睇啲,今次我係以一敵五,唔使搶鏡,最靚係我,冇得唔認,哈哈!」

恨再合作

問到有否向好友謝霆鋒「集郵」?她說:「未集呀!我哋有合唱過,但未做過騷,咁佢近年忙拍戲,集佢都幾好喎!(佢好Chok喎?)頂得住,但我唔Chok,上次霆鋒話係時候寫歌畀我,我懷疑佢今年再戰樂壇,所以佢有呢啲咁嘅計劃,好想同佢再合作!」

對於霆鋒跟張栢芝離離合合的新聞,身為局外人的祖兒說:「一齊又傳分開,分開又傳復合,循環再用好鬼環保!」問到是否贊成鋒芝復合時,祖兒說:「冇贊成冇反對,佢哋做乜都支持,我唔戥佢心急,都唔關我事,霆鋒係我好欣賞嘅朋友、同事,只要佢開心就得。」

音樂組

祖兒綵排時不忘與傳媒打招呼,氣氛融洽!

百厭的C AllStar在新歌MV中大玩油漆。